Lafaek News—Eis lutador ba ukun rasik an, Manuel Ribeiro, sente laran moras iha ukun rasik an ida ne’e nia la asesu liña eletrisidade kalan tuur nakukun, rezultadu husi luta ne’e ema seluk mak goja.
“Ha’u senti triste tebes iha ukun rasik an ida ne’e, tanba uluk iha nakukun laran mak ita luta hodi hetan naroaman, maibé ita hetan tia naroman, ita povu ki’ik nafatin sai vitima, dala ruma susar ba hahan, susar ba eletrisidade, susar ba bee mos, susar ba dalan, maibé la iha ema ida mak atu tau matan ba problema hirak ne’e, tanba ne’e ha’u senti triste bainhira ita nia governu sira la tau matan mai ami nia susar no terus ne’ebé hasoru durante ukun rasik an ida ne’e, hela iha uma ne’ebé la dignu, didin ho hadak no taka ho kalen ne’ebé kuak, susar tebes bainhira udan monu rai halo ami bo’ok an la diak,” Manuel ba lafaek news iha Kotabauro, Sesta, 7/04/2023
Manuel Ribeiro reklama Timor-Leste ukun an tinan 20 resin oan, maibé povu barak sei mori iha susar no terus nia laran, senti triste, tanba ukun an ona, maibé nia seidauk senti loloos benefisiu husi ukun an ne’e rasik, laiha eletrisidade atu fó naroaman ba povu iha areas remotas, laiha bee mos no laiha estrada ne’ebé dignu hodi asesu ba merkadu.
Manuel ho nia kaben iha oan na’in rua (2) moris iha nakukun laran, laiha eletrisidade atu fó naroman iha tempu kalan no laiha bee moos hodi hemu no tein han, presiza la’o ain ho distánsia ne’ebé do’ok ho kilometro 10 hafoin to’o iha bee matan hodi kuru bee. Dehan Avo Manuel.
Manuel Ribeiro ho idade 86, husi munisipiu Aileu, Postu Administrativu Aileu-Vila, Suku Seloi Malere, aldeia Kotabauro, moris ho agrikultura, loron-loron fila rai kuda modo no ai-fuan sira seluk, atu nune’e lori ba faan buka osan hodi sustenta familia uma laran no oan nia eskola, maske ho idade ne’ebé la merese atu halo ida ne’e, maibé moris mak obriga tenke kee rai.
“Ita tenki halo, se ita la halo se mak atu fó, tanba ukun an tinan barak ona, realidade povu barak mak sei halerik,” espresa nia.
Avo Manuel dehan, loron-loron kuda modo no ai-fuan sira, fila husi toos maske kole, maibé foti masa no ai-leba tau ba kabas la’o ho neneik hodi ba bee matan kuru bee moos hodi uza tein ba kalan han kalan nian, molok hetan bee mos, la’o ho distansia dook hafoin bele kuru bee, maske ho idade ne’ebé labele ona, maibé hakat neneik too iha bee matan ne’ebé dook,
Sorin seluk Imaculada Mendonça, nu’udar avo Manuel ninia feto foun hatete, durante tinan barak sira hela iha fatin ne’e susar tebes ba bee-mos ho eletrisidade, presiza la’o ain ho distánsia kilo-metru 10 foin to’o iha bee matan, nia parte senti triste iha tempu ukun rasik an ida ne’e.
“Iha tempu kampaña ita nia nai ulun sira mai promete tun sae, maibé realidade ba povu iha ne’ebé?, Imaculada kestiona.
Nia hatutan, loron-loron Imaculada ajuda avo Manuel ho servisu uma laran, moris iha situasaun ne’ebé defisil tenki esforsu hodi buka ba han hemu, maske moris iha susar no terus.
“Ita tenki iha espíritu vontade hodi servisu, atu nune’e bele hakman família uma laran no buat ne’ebé mak ita presiza, tanba iha ne’e hamutuk ami nain (6), kada loron ha’u sempre ajuda Avo kuru bee no fila rai, tuir lolos Avo la servisu ona, maibé nia dehanse nia la servisu nia senti moras. Nia hakotu.
Estajiadu : Crispin Amaral
Editor : Agapito de Deus
