Lafaek News—Inan faluk Fátima Soares idade tinan 70, ko’alia ho hirus ba lider partidus polítikus sira atu hapara ona uza povu kiik hanesan instrument ida hodi atinje sira nia objetivu de’it, hetan tiha kadeira goja osan subvensaun la liga povu kiik.
“ Nai ulun sira nia promesa falsu tempu kampaña kaer ukun haluha povu tanba Timor-Leste ukun an tinan rua nulu resin ona povu barak mak sei moris iha kondisaun mukit nia laran,” katak negosiante inan faluk Fátima Soares ba lafaek news iha Fatuhada foin lalais ne’e.
Negosiante Fatima Soares orijen husi suku Hoho Rai Ki’ik, Postu Administrativu Maubisse, Munisípiu Ainaro, loro-loron faan kioske kiik ida hanesan derok masin, bua, koto no dosi sona atu bele hetan osan rahun dollar ida ka rua iha loron ida hodi sustenta moris.
“Ha’u nia moris lor-loron fan sasan sira ne’e de’it, husi buat sira ne’e mak ajuda ha’u hetan netik osan rahun balu hodi sosa hahan no balu selu oan ba eskola, ha’u iha oan nain sanulu resin rua (12), mane (3) no feto (9), maibé sira hotu forma ona uma kain hela ha’u nia oan feto nain rua mak iha universidade, tanba ha’u nia laen kaben mós mate ona iha tinan rua liu ba kotuk, no oan mane sira mós hola feto laiha servisu hotu, susar tebes ba ha’u atu hetan osan hodi selu oan na’in rua ne’ebé mak eskola”, nia konta.
Nu’udar inan faluk ida tenki esforsu hodi buka osan, maske moris ho negosiu ki’ik, maibé naton ona atu nune’e bele responde nessesidade uma laran nomós ba oan nia eskola, moris iha sidade difisil atu hetan osan, hakarak ka lakohi tenki buka osan liu husi negosiu ki’ik ne’ebé mak iha atu nune’e bele hakman an familia uma laran no oan sira nia eskola.
“Maske husi sasan ne’ebé ita fan ho folin ki’ik, maibé agradese ita bele hetan hodi tulun ita han hemu, tanba buat hotu iha sidade lao ho osan, sé osan la iha ita atu halo saida loos no sé loos mak atu fó ita hodi sosa hahan ba han no haree oan sira nia eskola,” nia hakotu.
Estajiadu : Julio da Conceição
Editor : Agapito de Deus