Lafaek News—Vise koordenadór forsas tarefas prevensaun no mitigasaun Covid-19, Odete da Silva Viegas, informa, pasiente iha sala izolamentu nain 1 rekuperadu husi Corona virus, re-entrega ona ba familia.
“Ohin 20 fevereiru 2021 husi komisaun nasionál inkorpora tan pasiente Covid-19 rekuperadu na’in 1 husi Izolamentu Vera Cruz Dili,” dehan vise-KFPM Covid-19, Odete da Silva Viegas, iha konferensia imprensa, Sentru Integradu Jestaun Krize, CCD, Sabadu (20/02/2021).
Portavos dehan, pasiente rekuperadu ne’e Timor-oan mane ho idade 34, baixa iha izolamentu 3 fevereiru, iha ne’ebé swab teste dahuluk iha 16 fevereiru, teste daruak iha 18 fevereiru no rezutadu teste husi laboratótiu dala rua hatudu negativu, nune’e ministériu saúde re-entrega sidadaun ne’e ba nia nia família.
Koordenadór relata, dadus komulativu teste 20694, komulativu negativu 20549, hein rezultadu 42, komulativu kazu 103, kazu foun 0, rekupera 1, komulativu rekuperadu 82+4 = 86, atuál baixa 21, kuarentena 258 (dili 191, munisípiu 67), auto-kuarentena 7 (dili 6, munisípiu 1), passa ona 14 dias 8005 (dili 6575, munisípiu 1430).
Alende ne’e mós nia informa, Swab Screening Covid-19 hala’o ona ba komunidade iha Munisípiu Kovalima, Bobonaro no RAEOA, provizoriamente amostra swab hamutuk 1356, husi total ne’e iha amostra 994 mak lori ona mai Laboratóriu Nasionál, Dili, Rezultadu negativu hamutuk 718 no mós 276 mak sei hein rezuladu laboratóriu.
“Progresu swab screening ne’ebé ekipa halo iha Munisípiu Covalima atinji ona pursentu 73, Bobonaro pursentu 80 no RAEOA pursentu 38,” nia hatutan.
Enkuantu iha tipu vasina ne’ebé Governu Timor-Leste aprova maka AstraZeneca, ministéreiru saúde hamutuk ho parseiru sira ba kombate Covid-19, implementa ona advokasia kona-ba introdusaun vasina iha Timor-Leste iha 15 fevereiru liu ba, advokasia ne’e sei hala’o too fulan abril molok lansamentu vasina.
Jornalista : Sandi Belo
Asisten Editór : Pedro de Almeida
