Lafaek News—Ralasiona ho video ne’ebé virál iha media sosiál kona-ba pasiente ne’ebé da-daun ne’e iha izolamentu, Koordenadora Jerál Covid-19, Odete da Silva Viegas, hateten sira núdar pasiente tenke submete regulamentu labele halo protesta.
Koordenadora Jerál Covid-19, Odete da Silva Viegas, deklara pasiente sira ne’ebé iha sala izolamentu tenke kumpri regulamentu tanba pesoál saúde sira fo hatene ona ba sira saida mak sira atu halo, no profesionál Saúde sira mós lor-loron halo observasaun ba sira koko tensaun, hodi hatene kondisaun ne’e.
“Dala barak ami pesoál saúde ko’alia ema la fiar no tolok tan, maibé gracas a deus ho frontline nia servisu ne’ebé makaas to’o ohin ita rejistu kazu 49, maibé infelizmente ita boot sira tenke rekoñese katak laiha kazu todan, laiha mate, ne’e susesu boot ida maibé ita nunka rekoñese” dehan Kórdenadora Jerál Covid-19 Odete da Silva Viegas ba Jornalista sira iha Salaun Palasiu Sinzas Kaikoli, Segunda 04/01/2021.
Nia informa, pasiente kuandu pozitivu bele hamutuk iha fatin ida maibé la’os atu besik malu, sempre iha distánsia, see sira mak hakarak besik malu ne’e sira nia problema nune’e sira mak hakarak kontribui ba prosesu ne’e naruk, signifika sira rasik mak la kontrolu sira nia an.
“Ita boot sira tenke haree pontu de vista ne’ebé Ministériu Saúde halo, ita boot sira la’os foti de’it maluk sira iha izolamentu no karantina katak loos, ne’eduni ita tenke agradese tanba servisu boot ne’ebé halo to’o agora ita iha 49 kazus maibé laiha grave no mate” informa Odete da Silva Viegas.
Jornalista : Juvita dos Santos
Editora : Nelya Barros
