Lafaek News— Governu liuhosi ministériu Solidariedade sosiál no inkluzaun (MSSI) no ministériu administrasaun estatal (MAE) kompromete katak sei halo pagamentu ba lista reklamante hamutuk 12.597 iha loron 7 fulan ida ne’e.
Liuhosi konferénsia imprensa vise ministra solidariedade sosiál no inkluzaun, Signi C Verdiál, relata governu aprova ona osan hamutuk Millaun $2.519.400.00, hodi bele responde ka halo pagamentu ba lista reklamante hamutuk rihun Sanulu Resin Rua Atus Lima Sianulu Resin Hitu iha munisípiu 12 inklui RAEOA maibé tanba daudaun ne’e RAEOA sei lockdown maka pagamentu sei halo de’it ba munisípiu 12.
“Ami nia ekipa sei to’o iha suku sira ne’ebé rejistu ona lista reklamante iha loron 7 semana ne’e, nune’e husu ba lideransa komunitária ka autoridade lokál no PNTL atu apoiu ekípa nia servisu to’o remata. Aproveita ne’e mós ba benefisiáriu ne’ebé ho rendimentu liu $500 simu ona $200 favór depozita (fó fila) lalais iha sukursal BNCTL nian iha suku hotu-hotu,” Vise MSSI Signi afirma iha edifìsiu MSSI Kaikoli-Dili, tersa (05/01).
Entretantu iha biban ne’e mós diretór jerál MSSI en ezersísiu Florêncio Pina Días Gonzaga, informa viatura ne’ebé utiliza ba prosesu pagamentu hamutuk 76.
Afirma nia, alende ne’e mós MSSI hetan apoiu karreta hodi fasilita prosesu pagamentu refere hamutuk 51 hosi patrimoniu estadu.
Ikus nia argumenta tan, MSSI la aluga karreta tanba iha karreta rasik. Tanba ne’e, iha loron 7 fulan ida ne’e ekípa tékniku sei dezloka ba munisípiu hodi halo pagamentu ba reklamante sira.
Jornalista: Juvita dos Santos
Editór : Ezequias Tomás
