Lafaek News—Pasiente pozitivu Covid-19 ho naran inisiál A.A, ne’ebé oras ne’e baixa hela iha izolamentu lamentavel ho ekipa vijilánsia saúde ne’ebé halo teste swab ba familia hamutuk na’in 6 iha kinta (18/03/21) iha aldeia Avansa, suku Bairru-Pite postu administrativu Dom Aleixo, munisípiu Dili.
Pasiente ne’e kestiona, tanba antes ne’e teste swab dahuluk ba nia família nain-6 ne’e ho rezultadu negativu, no to’o agora seidauk halo teste swab ba faze daruak, maibé tanba saida ekipa vijilánsia kontaktu fali katak familia 6 ne’e hetan ona pozitivu covid-19.
“Horseik sira foti ami nia sampel hodi halo teste swab iha ami na’in 2 mak pozitivu sira na’in 6, seluk ne’e negativu hotu, hodi haruka sira halo auto-kuarentena iha uma hodi hein fali swab ba daruak, tanba saida mak seidauk foti sampel atu halo teste swab ba daruak ohin sira telofone fali mai dehan sira na’in 10 horseik negativu ne’e mos pozitivu hotu,” pasiente Covid-19, inisial A. A, via telefone ba Lafaek, kinta (18/03/21).
Pasiente pozitivu covid-19 ne’e hatutan, nia parte la simu ho rezultadu ne’ebé fó sai husi ekipa Vizilansia, tanba seidauk halo teste swab daruak ba nia família na’in 6 ne’e, maibé fó sai fali ona rezultadu katak pozitivu, portante antes ne’e ekipa vijilánsia ba halo teste ba sira no deteta na’in rua mak pozitivu no na’in sanulu negativu no haruka fila halo auto-kuarentena iha uma.
“Ha’u nia ama kiik mak pozitivu tanba nia halo kontaktu besik ho nia kolega ida ne’ebé maka antes ne’e pozitivu ona, no ha’u nia ama kiik servisu iha IADE, tanba ne’e mak ekipa vizilánsia mai halo teste swab ba ami iha ne’e hotu no deteta ami na’in 2 mak pozitivu tan, ha’u rasik ho tiu nia oan feto boot,” esplika pasiente Covid-19 ne’e
Inisial AA ne’e haktuir tan, sira ne’ebé mak rezultadu negative, parte saúde haruka sira fila auto-kuarentena iha uma to osemana 1, hodi hein fali teste swab ba daruak nian, maibé seidauk too semana ida foin mak loron 1 horseik, ohin ekipa vizilánsia kontaktu fali dehan sira ne’ebé mak halo auto-kuarentena iha uma ne’e nia rezultadu pozitivu hotu ona.
“Sira ne’ebé mak rezultadu negativu ne’e halo de’it auto-kuarentena iha uma to semana 1 hodi hein halo fali teste swab ba daruak nian, maibé seidauk too semana ida foin mak loron 1 horseik, ohin ekipa vizilansia kontaktu fali ami dehan sira ne’ebé mak halo auto-kuarentena iha uma ne’e nia rezultadu pozitivu hotu ona, entaun halo ami duvida tanba teste dahuluk ne’e sira nia rezultadu negativu, no seidauk halo teste swab ba daruak ohin sira dehan ona pozitivu, ne’e sira halo teste swab nusa mak ne’e,”dehan nia
Entretantu, husi ema na’in 6 ne’ebé iha da-daun ne’e evakua ona ba izolamentu Tasi-Tolu, kompostu husi feto 6 no mane na’in 4, ho idade 15 ba kraik na’in 6 no inklui labarik na’in 4 negativu lori hotu ba izolamentu, tanba ema atu haree iha uma laiha.
Jornalista : Sandi Belo
Asiténsia Editór : Egidio Nono
