Lafaek News–Prezidente Autoridade Munisípiu Díli (PAMD), Segunda (13 /11 /2023), Husu ba Ministériu Obras Publika (MOP) atu hadi’a kondisaun estrada husi diresaun Fatuk-ahi ba Aldeia Lenuk Hun, suku Kamea, postu administrativu Cristo-Rei, munisípiu Díli, nune’e komunidade bele asesu ba merkadu sosiál.
Kestaun ne’e hato’o husi Prezidente Autoridade Munisípiu Díli Guilhermina Saldanha, bainhira hala’o observasaun direta ba eleisaun orgaun suku iha aldeia refere katak, estrada hanesan meius komunikasaun ida ne’ebé komunidade sira bele la’o ba mai entaun hare’e katak kondisaun estrada husi diresaun Fatuk-ahi mai Lenuk Hun a’at tebes tanbá ne’e presiza tebes husi Ministériu Obras Públika ne’ebé mak iha responsabilidade ba estrada atu bele tau ba asuntu importante hodi hadi’a estrada refere.
“Hanesan prezidente autoridade husu ba MOP halo favór bele hadi’a hela estrada ne’e tanbá bailoron mos hanesan ne’e ona no tempu udan mos ita nia komunidade sei la konsege halo movimentu ba mai no tuir informasaun mos katak iha ne’e bee moos mos susar la halimar, entaun husu ba MOP nomós Sekretáriu Estadu BTL. Ep ka Sekretáriu Estadu Agua Eletrisidade Saneamentu atu hare’e oinsa buka tok posibilidades ba fasilidade hirak ne’e, pelu menus Bee ne’e tenke mai para ita nia komunidade bele sente saida maka durante ne’e sira nia halerik liu-liu ba bee no estrada talvez mos eletrisidade tanbá bua tolu ne’e mak sai hanesan baze ba infraestrutura ninian,” Guilhermina dehan.
Nia haktuir tan, Tuir dadus ne’ebé mak foin dadauk xefe suku sira balun hato’o katak presiza hadi’a estrada tanbá kuandu ko’alia kona ba estrada ne’e bele dehan katak ida ne’e estrada protokolu entaun ida ne’e la’ós kompeténsia autoridade lokál ninian maibé hanesan autoridade lokál hato’o nafatin ba ministériu relevante atu bele hare’e oinsá hadi’a netik estrada ida ne’e, bainhira estrada ne’e di’ak bele fasilita komunidade sira atu lori sira nia produtu ruma ba fa’an iha merkadu envezde sira tane liman ba governu i governu kria fasilidades atu bele hadia sira nia aan liu husi produtu ne’ebé sira iha.
“Kona ba bee moos ami mos tama hela iha ami nia planu tuir kompeténsia ne’ebé mak ami nian ami buka esforsu atu hala’o maibé tuir kompeténsia ne’ebé mak dehan Ministériu nian ami sei tenta nafatin ba Ministériu atu hare’e parte saida mak ita nia komunidade sira halerik kona-ba bee no estrada,” hakotu nia.
Jornalista : Paulo Collo
Editor : Agapito de Deus
