Lafaek News—Deskonfia ema deskoñesidu tenta sunu inan faluk Palmira Guterres iha area Besidade aldeia Halidolar suku Hera postu administrativu Kristu-Rei munisípiu Dili.
Akontesimentu ne’e mosu, bainhira inan faluk Palmira Guterres ho nia oan sira ba selebra tiha loron matebian iha postu administrativu Venilale, munisípiu Baukau, iha loron 31 fulan Novembru 2023, hafoin faluk ho nia oan mane fila fali husi Venilale mai Hera iha loron tersa (02/11/2023), teki-teki haree ba uma kotuk ema deskonesidu sunu ai-lele lahuk boot ida monu latan iha uma kotuk, sunu husi lahuk ne’e hela de’it metro 2 ahi daet ba faluk nia uma ne’ebé didin ho piku.
“Ami la hatene se mak sunu loos, ami foin fila husi loron matebian iha Venilale iha dia 2, mai too uma Hera, haree ema ahi moris husi ai-lele lahuk ne’e konsege han tama too uma laran ne’ebé uluk ai lele ne’e tohar hanehan monu kalen ho ai nabutuk iha rai, hela de’it metro rua resin ahi haan ba uma laran, maromak boot ahi la han ha’u nia uma,” haktuir inan faluk Palmira Guterres ba Lafaek News iha nia rezidénsia Besidade aldeia Halidolar suku Hera, Segunda (13/11/2023).
Faluk ne’e haktuir, ema balun mak hanoin at ba nia karik, ko’alia de’it labele sunu fali ai lahuk iha uma ninin, sorte ho maromak nia tulun ahi han too iha uma at ne’e nia laran besik ona atu da’et ba uma teki-teki ahi mate-iha klaran.
“Ha’u nia uma ne’e, bainhira ha’u sai tiha ba fatin ruma, ema sempre mai foti ha’u nia sasan, atu sunu tan ha’u nia uma, uluk ha’u lori tiha modo ba fan iha merkadu Taibessi, fila mai ha’u nia sanyu rega modo unidade 3 ema na’ok hotu, kuitadu tansa ema la respeita ha’u ferik faluk ne’e,” haktuir faluk ne’e ho triste.
Inan faluk ne’e haktuir tan, durante ne’e nia laiha problema ruma ho ema, maibé ema sempre hatudu hahalok ne’ebé la respeita ema seluk nia direitu moris hanesan sidadaun Timor, ne’ebé hakerek iha konstituisaun katak ema hotu iha direitu moris hakmatek no iha estabilidade nia laran.
“Ha’u atu ba hatoo keixa ba autoridade seguransa no parte justisa, maibé ha’u sente ladun di’ak tanba ema ladun konsidera ha’u, ezemplu maki ha loron 30/08/2023, ema ne’ebé sosa rai ne’e, no konsege ho nia ekipa lori eskavator ho sasan kroat ameasa, ida ne’e too agora bainhira ha’u ba konfirma iha ministériu públiku, maibé staff sira ne’ebé servisu iha ne’eba, dehan mai ha’u katak sistema mak la di’ak ona atu rejista ha’u nia kazu hira ne’e, nune’e liga ho ema deskoñesidu tenta sunu ha’u nia uma, di’ak liu ha’u hatoo informasaun ba media de’it atu públiku bele hatene,” inan faluk ne’e haktuir.
Observasaun lafaek news iha terrenu nota, ema deskoñesidu sunu ai-lele lahuk ne’ebé uluk monu hanehan faluk nia uma hetan estragus total, too ohin ai refere lahuk ona, derepente ahi haan husi ahi lahuk ne’e falta de’it metro rua resin atu han da’et ba faluk uma piku ne’ebé rabat kedan ho ai-lele lahuk ne’e.
Ekipa Kobertura : Lafaek News
Editor : Agapito de Deus
