EKONOMIA · 16 Apr 2021 10:23 ·

OXFAM Apoiu APFTL Hala’o Expozisaun Juvenil Iha Setór Produtivu


OXFAM Apoiu APFTL Hala’o Expozisaun Juvenil Iha Setór Produtivu Perbesar

Glenu-(Lafaek News)—Oxfam Timor-Leste servisu hamutuk ho Alumni Parlamentu Foin sa’e (APFTL) hala’o ona espozisaun ba dahuluk iha Gleno, munisípiu Ermera iha loron 4 Marsu 2021, ho objetivu promove partisipasaun juventude sira iha setór agrikultura no setór produtivu seluk atu hametin diversifikasaun ekonomia iha Timor-Leste.

Liu husi espozisaun no diálogu aberta entre membru governu no grupu juventude 13 ne’ebé hala’o servisu iha setór agrikultura hamutuk hodi hamosu Deklarasaun Glenu hodi fó hanoin ba governu atu kontinua fó prioridade ba setór produtivu sira, atu haburas liután ekonomia rai laran.

“Hanesan ita hotu hatene, maioria populasaun Timor-Leste kompostu husi joven sira ne’ebé reprezenta 74% husi total populasaun menus husi tinan 35 tuir rezultadu sensu 2015 nian inklui mós Relatóriu Dezenvolvimentu Umanu 2018 UNDP nian. Populasaun ho idade joven ne’e sai nu’udar poténsia ba estadu hodi tau importánsia nune’e bele kontribui ba dezenvolvimentu nasionál, liu-liu partisipa iha dezenvolvimentu setór produtivu sira hodi kontribui ba ekonomia família no nasaun nian,” hateten iha komunikadu imprensa ne’ebé lafaek news asesu husi media ofisial OXFAM, sesta (16/04/21).

Liu husi programa espozisaun juveníl iha setór produtivu ne’ebé fasilita husi Oxfam no APFTL iha loron 4 fulan Marsu liu ba iha Glenu, munisípiu Ermera, fó oportunidade no espasu ba grupu joven sira ne’ebé orienta ona sira nia-aan ba setór produtivu sira hodi hato’o sira nia dezafiu no problema ba membru governu sira ne’ebé partisipa iha eventu ne’e.

Entretantu, membru governu hirak ne’ebé partisipa direta iha espozisaun ne’e mak hanesan Ministru Turzimu Komérsiu no Indústria (MTKI), José Lucas do Carmo,  Ministru Agrikultura no Peskas (MAP), Pedro dos Reis,  Sekretaria Estadu Kooperativa (SEKoop), Elizáriu Ferreira, Sekretaria Estadu Juventude Desportu (SEJD), Abrão Nokosiku Saldanha, no reprezentante sira husi autoridade munisípiu Ermera.

Iha komunikadu ne’e sita katak membru governu hirak ne’e promete sei konsidera grupu sira nia hanoin iha dezenvolvimentu polítika ba programa governu nian.

Durante espozisaun juveníl iha setór produtivu ne’ebé hala’o iha Munisípiu Ermera, grupu joven sira inklui feto no ema ho defisiénsia iha oportunidade hodi fahe susesu sira husi sira servisu no inisiativa sira iha setór produtivu, nune’e mós dezafiu sira ne’ebé sira enfrenta ba autoridade estadu nian. Difikuldade no dezafiu sira ne’ebé  maioria grupu joven sira ne’e hato’o mak hanesan :

’Laiha abilidade kona-ba jestaun organizasaun, finanseiru, lideransa, marketing, menus kapasidade finanseiru, menus abilidade kona-ba produsaun ho kualidade hanesan produsaun ai kulat, la iha fatin própriu hodi halo atividade produsaun, Menus ekipamentu no material ba produsaun, Ezemplu (mákina hodi harahun/penggilingan, NTK Tester(hodi hatene kompozisaun husi adubu,  material hodi ukir (bahat, gurinda, Mesin Las), mákina produz ai-han ikan, mákina bomba be’e hodi halo sistema (Recirculation Aquaculture System), material sukat be’e (PH meter, termomether, Aerator ka mákina ne’ebé kria oxigenio ba kolan ikan.

Reflete ba dezafiu no problema hirak ne’ebé temi iha leten no difikuldade ne’ebé grupu joven sira no ema ho defisiénsia sira hasoru iha sira nia kriatividade durante hala’o sira nia atividade produsaun, presiza governu nia intervensaun hodi konsidera iha polítika no/ka programa governu nian.

Iha prosesu diálogu aberta ne’e governante sira hato’o mós polítika no estratéjia kada ministériu hirak ne’ebé servisu iha setór produtivu sira, nune’e iha karta deklarasaun ne’e grupu joven no ema ho defisiénsia sira hakarak deskreve kona-ba intervensaun husi governante sira durante diálogu aberta liu husi sira nia mensajen xave sira mak hanesan tuir mai:

Iha okaziaun ne’e Ministru Turizmu Komérsiu no Indústria (MTKI), José Lucas do Carmo, hatete, mtci nia programa ida mak naran ‘’centru inkubasaun ba emprezariu foun sira ka movimentu emprezariu juvenil” ne’e loke espasu ba joven sira maibe joven sira tenke lori ita boot sira nia interese hodi ba diskuti iha ministeriu atu bele indentifika lolos ita boot sira nia planu negósiu, MTCI iha programa ida naran ‘’creditu funan kiik ba emprezariu foun’’, kreditu másimu to’o $ 5.000.00  ho funan 3% de’it.

Iha fatin hanesan, Ministériu Agrikultura no Peskas (MAP), Pedro dos Reis, haktuir atu hasa’e produsaun agrikola no atividade produtivu sira presiza ema hotu nia partisipasaun no joven sira mos hahu ona ho asaun, atu nune’e ita bele halo produsaun ho kuantidade bo’ot hodi atinji nivel ida ne’ebé bele exporta ba rai-liur, iha nia intervensaun hateten katak ita nia produsaun foos mos sei menus kompara ho ita nia nesesidade  loron-loron ne’ebé  presiza 141.000 tonelads kada tinan, maibe ita nia rai foin ho 18-19eEktares foin bele produs por volta de 39.00  toneledas kada tinan, tanba ne’e mak hakarak ka lakohi ita tenke importa fos husi nasaun seluk, tanba ne’e mak joven sira nia prezensa ita bele hanoin ona oinsa reduz importasaun ba produtu agrikola ho siensia sira mak joven sira aprende no teknoloia sira ne’ebé  joven sira aprende. Haree ba produtor agrikola iha rai laran maioria idade la produtivu hotu ona ka ferik katuas hotu ona mak barak, tanba ne’e presiza joven sira ba iha kampu de produsaun agrikola hodi produs hahan kompleta nesesidade ne’ebé  ita presiza iha nasaun.

SEKoop, Elizáriu Ferreira, mós reafirma, programa edukasaun, formasaun no informasaun adopta husi prinsípiu kooperatíva internasionál katak; (hahu ho edukasaun, dezenvolve ho edukasaun, kontrola ho edukasaun, depedensia ba eduksaun) kriasaun ba kooperatíva (tuir orientasaun Primeiru-Ministru Taur Matan Ruak iha 2020, hateten katak kooperatíva iha suku Minimu 2, kooperatíva sei to’o deit iha nivel postu, kooperatíva sei mosu iha suku bazeia ba potensia suku.

Nune’e mós, Sekretariu Estadu ba Juventude no Desportu, (SEJD) Abrão Nokosiku Saldanha, tinan ida ne’e (2021) SEJD iha programa ida naran estimulasaun atu orienta joven sira kona-ba auto empregu, rendimentu sosial ka kria empregu ba nia an rasik iha area setor produtívu sira, iha 120 suku, hodi estimula joven sira hare kampu ne’e hanesan oportunidade servisu (peska, pekuaria, ortikultura, akuakultura, no nst) tuir konservasaun ambiental, tinan ida ne’e iha mos Programa kona-ba festival joven kriadores ne’ebé  ita hanoin atu fo premiu ba joven sira ne’ebé   iha kapasidade halo produsaun, inovasaun no kreatividade hodi aprezenta atu publiku bele hare no emita tuir, hodi muda mos publiku nia mindshet ne’ebé  hanoin ita joven ne’e mak autor deit problema,

Ho nune’e liu husi karta ida ne’e, grupu joven produtivu sira ne’ebé kompostu husi feto ho mane inklui ema ho defisiénsia sira hakarak hato’o sira nia deklarasaun konjuntu, nu’udar aktu rekomendasaun ba governu hodi bele toma konsiderasaun iha governu nia programa no planu orsamentu estadu ba tinan 2022 no iha futuru mak hanesan:

Husu ba VIII Governu Konstitusionál liu husi Ministériu Turizmu, Komérsiu no Indústria atu insentiva no fasilita grupu joven produtivu sira hodi asesu ba kréditu ne’ebé ho funan ki’ik, hodi kontribui no dezenvolve di’ak liután grupu joven sira nia atividade produsaun. Alende ne’e fasilita formasaun tékniku ba planu negósiu, oinsá bele asesu informasaun no halo rejistu ba sira nia grupu, fornese ekipamentu ne’ebé bele halo teste ba kualidade produtu sira molok fa’an ba merkadu.

Husu ba VIII Governu Konstitusionál liu husi Ministériu Agrikultura no Peskas atu dezenvolve planu orsamentu no investimentu ba grupu joven sira ne’ebé iha kriatividade no halo ona investimentu iha setór agrikultura no setór produtivu seluk,  fornese apoiu tékniku ne’ebé adekuadu fasilita formasaun kona ba oinsá aumenta kapasidade produsaun iha area ortikultura, aquakultura, kafé no poténsia seluk iha setór agrikultura ne’ebé ho valor as no orgániku, tanba investimentu sira ne’e sei fó oportunidade servisu ba ema barak, liu-liu joven sira hadi’ak ekonomia uma kain, no mós bele kontribui ba dezenvolvimentu ekonomia nasaun nian iha futuru.

Husu ba VIII Governu Konstitusionál, liu-liu Sekretáriu Estadu Kooperatíva atu apoiu formasaun kona ba Kooperatíva iha setór produtivu sira, hodi hametin servisu hamutuk entre joven sira ne’ebé kriativu no inovativu iha setór agrikultura no setór produtivu seluk, inklui formasaun sira kona ba jestaun organizasaun no Finanseiru, Lideransa, Merkadorias hodi hasa’e sira nia abilidade.

Husu ba Sekretariadu Juventude no Desportu atu investe orsamentu adekuadu ba grupu joven inovativu sira hodi promove sira nia kriatividade no inovasaun ne’ebé sira halo iha setór produtivu liu husi festival, espozisaun no maneira seluk ne’ebé bele estimula no fó oportunidade entre joven sira atu aprende hamutuk hodi fahe esperiénsia no matenek ba malu.

Husu ba Autoridade Munisípiu Ermera, atu bele apoiu fornese espasu adekuadu, hodi fasilita grupu joven sira nia atividade produsaun iha setór agrikultura no setór produtivu seluk.

Husi rekomendasaun sira ne’e, ami grupu joven produtivu sira nafatin iha kometimentu no hakarak dezenvolve liután ami nia kriatividade no investimentu iha setór agrikultura no setór produtivu seluk. Ami mós prontu atu partisipa no halo diskusaun formal no informal ho Sua Exelénsia sira iha kada Ministériu ne’ebé relevante hodi fahe ami nia hanoin bainhira hahú Ita-boot sira halo planu Orsamentu 2022 nian. Ami mós hakarak atu kontinua servisu hamutuk ho governu atu kontribui ba dezenvolvimentu ekonomia iha setór agrikultura no setór produtivu seluk ne’ebé nuudar parte ba diversifikasaun ekonomia iha Timor-Leste. Prosesu hakerek no to’o finaliza deklarasaun Gleno ida ne’e hetan suporta tékniku husi Oxfam no mós APFTL.

Reprezentante husi Grupu Juventude Produtivu, mak hanesan Timor Leste Orgániku Fertilizer (TILOFE), Fundus Ba Nafatin (FBN),  Agua Kultura Ermera (AKER), Ermera Ai-Kulat Mutin Orgániku (EAMOI), Forum Juventude Defisiente Ermera (FJDE), Hally Fuik (HK), Hamutuk Hakbiit Soin Orijen (HHSO), Inisiativa Dezenvolvimentu Ortikultura Rural (IDOR), Kafé Orgániku Atsabe (COA), Tane Crew (TC), Youth For Blue Action Development Initiative (YFBADI), Grupu UNTL, no Korpu Rinbawan ETCI. (*)

1,094 Views
Artikel ini telah dibaca 31 kali

badge-check

Editor

Baca Lainnya

Kandidatus 42.464 Pasa Vaga Online Austrália

18 July 2024 - 09:15

Setor Rua Nudar Baze Ba Ekonomia Timor Leste

15 June 2024 - 17:58

Kompania Ida Husi Austrália Bele Produz Adubu orgániku Husi Popok Labarik Nian

14 June 2024 - 17:49

ILO Ho Tradelnvest  Haforsa Negosiu Nu’u Ba Coconut Oil Iha TL

23 May 2024 - 17:26

BUNDA Loke Servisu ba Komunidade Liu Husi Transforma Aihan Lokal ba Aihan Modernu   

26 April 2024 - 23:24

Traballadór Austrália Fulan 1 Manan $ 4.000 Too $ 5.000

26 April 2024 - 09:13

Trending di EKONOMIA