Lafaek News—Ministériu Solidariede Sosiál no Inkluzaun (MSSI) liu husi Diresaun Nasionál Asisténsia Sosiál (DNAS) kona-ba prosesu pagamentu programa bolsa-da-mãe ba labarik sira iha territóriu laran benefisiariu hamutuk 4.8820 ho osan millaun $6.129,180.
“Progrma bolsa-da-mãe ida ne’e hahu iha tinan 2008 nia objetivu prinsipal maka redusaun pobreza ba família ki’ak sira nia oan, primeiru atu asegura ki’ak sira nia oan, husi idade 0 to’o 5 atu bele asesu ba atendementu saúde, segundu idade 6 to’o 16 asegura família ki’ak sira nia oan bele asesu ba ensinu báziku obrigatóriu,” dehan DNAS Lucas Tois, ba lafaek news iha nia kna’ar fatin MSSI kaikoli, tersa, (16/02/2021).
Nia dehan, husi programa bolsa-da-mãe ne’e ba labarik teritóriu laran tomak no dadus hatudu benefisiarius ne’ebé halo pagamentu hodi kontribui ba redusaun probreza kiak.
“Programa ida ne’e investe ona orsamentu hamutuk Millaun $ 6,129,180, halo pagamentu ba benefisiáriu hamutuk 48820 ne’e iha 12 munisípiu inklui RAEOA, ne’ebé ho montante orsamentu ida ne’e BNCTL nu’udar ajénsia implementadór ba transferénsia benefisiáriu nia konta bankária mak hahú halo pagamentu husi fulan Dezembru to’o agora,” nia relata.
Nia dehan, osan hirak ne’e transfere ba BNCTL sira iha kada munisípiu inklui RAEOA tuir kada benefisiáriu, maibé iha dekretu lei define katak família ida, labarik nain tolu maka hetan, kada labarik ida $.5, entaun tinan ida $60.
Nia esplika tan, pagamentu bolsa-da-mãe ba labarik sira hare’e husi saldu família nian ne’ebé ki’ak, família ne’ebé vulneravel no defisiénsia no mós família balun ne’e inan aman fahe malu, família ne’ebé inan-aman kumpri hela pena prizaun sira ne’e hotu asesu.
Diretor fundamenta, implementa programa ne’e bazeia ba dekretu lei nu.18/2012, ho kriterius hotu iha lei ne’e rasik atu garante labarik sira tenke remata sekundéria, se atinje ona idade 17 sistema ka programa ne’e rasik esklui, entaun alin maka subtitui hodi hetan pagamentu.
Nia informa tan, tuir avaliasaun lubuk ida la’o ona husi banku mundial husi ajensia intenasional balun katak nia kontribuisaun ba redusaun pobreza ne’e uituan los, entaun sedauk iha susesu no nia perjentajen mós tun maibé atu sukat programa ema nia moris tenke liu husi peskiza ida no avaliasaun para ita hatene lolos nia persentajen katak osan ida ne’e kontribui duni ba redusaun ba pobreza iha Timor-Leste.
Jornalista : Pedro de Almeida
Editora : Nelya Barros
