Lafaek News— Ospitál Nasionál Guidu Valadares (HNGV) liu husi Gabinete Kontrolu Kualidade Komunikasaun Sosiál, Sara Maria F. Xavier, afirma, iha fulan Janeiru 2021, rejista pasiente triajén iha emerjénsia hamutuk 4639 inklui kazu violasaun sexual ema na’in1.
“Pasiente ne’ebé halo triajén iha emerjénsia hamutuk 4639, asidente tráfegu ho motor hamutuk 104, asidente trafegu ho karreta hamutuk nain 8, violensia fízika ou hetan pankada ne’e hamutuk nain 10, hetan sona nain 2, violensia fízika sosiál ou hetan tuda nain 2, hana ho rama ambon nain 1, ema baku na’in 6, no violensia sexual nain 1, intoksikasaun ou ho hakarak oho an ne’e nain 4, asidental nain 4, lanu todan nain 12,” esplika Xefe Gabinete Kontrolu Kualidade Komunikasaun Sosiál, Sara Maria F. Xavier, ba jornalista sira iha HNGV Bidau, Tersa semana ne’e.
Xefe Gabinete esplika, pasiente ne’ebé maka alta husi emerjénsia hamutuk nain 2397, iha fulan janeiru, pasiente ne’ebé maka lakon nia vida iha emerjénsia HNGV hamutuk nain 16.
“Pasiente sira ne’e nain 6 mate kedas iha dalan antes too iha emerjénsia no nain 10 mate iha emerjénsia ho kauza husi hipertensaun, shook ka ran fakar barak, atakasaun fuan, no mate mós ho kazu komplikasaun sira seluk,” tenik nai.
Entretantu, total Inan ne’ebé ba iha maternidade hamutuk 378, entre numeru ne’e inan ne’ebé maka partu hamutuk 382, partu normal 265, sejariana 97 no partu ventoza hamutuk 20, enkuantu iha fulan janeiru tinan 2021 seidauk iha inan ne’ebe maka lakon nia vida iha Ospitál Nasionál Guido Valadares (HNGV).
Jornalista : Sandi Belo
Assisten Editór : Pedro de Almeida
