Lafaek News—Primeiru Ministru oitavu governu konstitusionál, jeneral Taur Matan Ruak, rekoñese populasaun sira seidauk asesu informasaun di’ak, tanba kapasidade kobertura Radiu Televizaun Timor Leste (RTTL.EP), kobre de’it porsentu 48 iha Timor Leste.
“Ita nia Rádiu Televizaun Timor-Leste iha kapasidade halo kobertura ba ita nia rain atinje de’it 48 porsentu katak populasaun barak iha ita nia rai laran, fatin barak iha ita nia rai mak kobertura Rádiu Televizaun Timor-Leste nian la to’o, tanba ne’e mak barak la haré RTTL haree fali Metro TV no televizaun sira seluk husi nasaun seluk, aleinde ne’e kolega sira informa kona-ba situasaun Rádiu televizaun nian katak matérial sira ne’ebé ita iha tuan ona no la serve ba livre dezenvolvimentu ida ne’ebé ohin loron ita iha,” TMR hato’o asuntu ne’e iha nia diskursu iha lansamentu sistema Dijitál Transmisaun Multimédia Terrestre (DTMB) ba RTTL.ep iha suku Guisu, Postu Administrativu Maubara munisipiu Likisa, tersa semana ne’e.
Primeiru Ministru akresenta, objetivu governu nian maka halo esforsu tomak hodi halo parseiru ho estadu Repúblika Popular Xina hodi dezenvolve televizaun atu atinje porsentu 100, governu Timor Leste ho governu Xina halo ona koperasaun atu servisu hamutuk iha área barak durante tinan 20, area sira hanesan, defeza seguransa, edukasaun, Saúde no seluktán, no ohin bele desemina tan área importante ida iha kóperasaun komunikasaun sosiál nian.
“La’os fasíl tanba ita nia rai mesak foho de’it entaun asesu difisil tebes, presiza organizasaun lojístika ida ne’ebé kompleksu forsa ho vontade ita sei konsege, iha orsamentu estadu 2021 ita sei tau osan hodi aumenta tan ita nia torres, nune’e ita nia tarjetu, ita nia ambisaun, ita nia mehi 2023-2024 ita nia populasaun 100 porsentu bele hetan hotu televizaun” dehan, Primeiru Ministru Taur Matan Ruak.
Iha fatin hanesan, Prezidente Konsellu Administrasaun RTTL.ep Fransisco Gary hateten, Rádiu Televizaun Timor-Leste RTTL.ep iha tinan ida ne’e koko hakat ona ba sistema dijitál, maibé ne’e hanesan projetu ida ne’ebé koko atu halo transmisaun iha Timor-Leste, no ida ne’e realiza tanba hetan apoiu husi governu Xina servisu hamutuk ho governu Timor-Leste.
“Projetu ne’e nia instalasaun lori tinan rua no ohin loron ita kontente tanba bele halo lansamentu no ita iha parte pakote husi intalasaun dijitalizasaun ekipamentu RTTL nian mak formasaun ba ita nia tékniku RTTL nian, hodi eleva sira nia koñesimentu di’ak maibé ida ne’e seidauk to’o tanba ita presiza ekipamentus ne’ebé atu apoiu dijitalizasaun, ne’e duni da-daun ita sei la’o ho analog nia output ne’ebé sai iha dijitalizasaun seidauk iha mudansa barak, más ho prezensa ida ne’e mós komunidade balun bele foti alternativu hodi asesu 22 kanais iha RTTL.ep” dehan Prezidente Konsellu Administrasaun RTTL.ep Fransisco Gary.
Jornalista : Juvita dos Santos
Editora : Nelya Barros
