Lafaek news—Organizasaun Huata Atsabe La Ave (HALA) kinta 26/12//2024, realiza tan konferensia ba daruak tinan 2024 nian Tema Atsabe Haktuir no Rona ninia Istória, atividade ne’e hala’o durante loron 3 hahu husi loron 26 no sei termina iha loron 28 Dezembru.
Administrador Postu Administrativu Atsabe Manuel Oliveira, esplika liu husi diskursu dehan, atividade konferénsia ne’e atu hatene Istória Atsabe nian no ba oin Atsabe ho ninia kreatividade atu nune’e bele relembra oinsá bele kria Atsabe ho fatin ne’ebé furak, liu husi atividade ida ne’e, hodi hanoin hikas ba Abo feto no mane inklui inan-aman sira ne’ebé oras sei moris atu bele konta fali ninia istória Atsabe.
“Ho Nune’e Jerasaun foun atu labele haluhan ita nia istória, tan dala barak jerasaun foun wainhira konta istória la tuir ninia referensia, i la tuir nia realidade maka ita nia Apa sira ne’ebe sei moris bele konta istória ne’ebe hatu’ur ona, Ho ida ne’e mak foka ba atividade ida ne’e ho hanoin katak Atsabe ba oin, ho signifika katak (HALA) Hoata Atsabe La Abe,” Adminustardor Atsabe ne’e haktuir ba Lafaek News iha Atsabe hafoin abertura ba konferénsia Daruak iha loron 26/12/2024.
Reprezentante governu lokal ne’e haktuir, programa ida ne’e furak tebes, fiar katak ho atividade loron tolu ne’e husu ema hotu ninia prezensa másimu atu nune’e bele rona ho didi’ak, istória hirak ne’ebe haktuir husi lia nain no veteranos sira hodi nune’e bele hatutan istória ne’e ba jerasaun foun.
Iha Sorin seluk Coordenador HALA Pe. Bento, hateten Atsabe hori uluk kedas hakerek nia istória ho nia moris, maibé ema seluk mak haktuir fali liu husi ema seluk nia hakerek no ema nia konta, maibé furak liu wainhira Atsabe-oan sira rasik mak haktuir sira nia istória no rona mos sira nia istória rasik
“Bása ita rasik mak halo istória ida ne’e, ita rasik mak hahú istória, ita rasik mak halo no oras ne’e ita kontinua nafatin hela ita nia istória hanesan povu Atsabe, istória mak mestre ita ema sira moris hanesan baibain ema hateten,” Pe. Bento sublina.
Koordenador organizasaun HALA ne’e hatoo mos agradesimentu ba partesipante sira liliu ba Administrador Postu Atsabe ho nia ekipa tomak ne’ebe kolobora hodi realiza konferensia kona-ba (Atsabe sira Haktuir no Rona Fali sira nia istória) no mos ba kampania ba Atsabe ambiente Mos no saudável.
“Ohin loron ita duni maka halo los maka ita atu hatudu no haklean ita nia istória rasik, hau espera konferensia ne’e sai nu’udar fundamentu ida ne’ebe maka, hanesan mos oportunidade atu ita bele lembra ita nia istória, ita Haktuir ba malu para bele la’o ba oin, ita hotu hotu iha responsabilidade atu lori povu sira ba oin no ita simu responsabilidade bo’ot, Ita tenki hala’o duni atu nune’e ita hatene ita nia istória ita bele halo diak liu tan iha tempu sira ne’ebe maka sei mai,” nia haktuir.
Entretantu Husi atividade ne’ebe hala’o durante loron tolu (3) ne’e orador sira mai husi Lia-nain ne’ebe representa kada suku ida-idak nian ne’ebe iha postu Atsabe hodi partilha istória nebe kona ba Ukun no Bandu iha suku ida-idak nian no kada lisan ida-idak iha tempu Pasadu no ohin loron nian,
Iha koneferénsia daruak ne’e mos organizasaun HALA involve mos Veteranos Regiaun IV ho frente klandestina Atsabe ne’ebe hala’o sira luta no kontribuusaun husi tempu Japones no portuguese no Indonesia ukun, iha biban ne’e atu partilha istória hirak ne’e liga ba kontribuisaun veteranus nian durante luta.
Observasaun jornalista lafaek news nota katak husi atividade ne’ebé hala’o durante loron 3 ne’e partesipa másimu husi lian nain sukus hamutuk12 husi postu administrativu Atsabe nian, eventu ne’e la’o di’ak tanba partisipasaun másimu hushi populasaun inklui hetan seguransa husi PNTL eskuadra Atsabe.
Jornalista : Felix Fernandes
Editor : Agapito de Deus