Lafaek News— Kbi’it laek Maria da Consceição Simões ho idade 55, orijen husi Munisípiu Same Postu Turiscai Suku Caimauk, oan husi Tetmau no Caihetu nudar mos familia ho Proklmador RDTL, Francisco Xavier do Amaral, oras ne’e da-daun tutur batar hali sidade Dili hodi buka moris hatutan nesesidade uma laran.
Maria da Conceição nudar mos membru OPMT iha tempu ne’eba (Indonezia) too iha tempu okupasaun Indonézia, maibé laiha ema ida mak rekoñese Maria nia kontribuisaun, Maria deside an hodi hala’o de’it nia moris hanesan ema kbiit laek too ohin loron independénsia.
Maria haktuir, nia aman uluk hamutuk ho Avo Xavier, hala’o servisu informasaun nia alin ba Avo Xavier nian, servisu too mate iha ailaran too agora ruin buka la hetan, hetok liután estadu ohin loron la buka tuir familia husi saudozu Francisco Xavier do Amaral ne’ebé lakon hotu isin lolon hodi defende ukun rasik an ida ne’e.
Kbiit laek Maria da Conceição Simões hateten katak nia oan husi proklmador Francisco Xavier do Amaral nia maun boot (dahat), ne’ebé uluk hamutuk ho nia alin saudozu Xavier luta hasoru invazor illegal iha Timor Leste, ba da-daun familia saudozu Xavier nian moris terus iha independénsia no Liberdade nia laran.
Situasaun ne’ebé akontese ba familia heroi ne’e sai lolos liafuan husi proklamador ne’e katak ema ne’ebé uluk luta sei sai fali atan ba nia rain rasik, ema ne’ebé uluk lakohi ukun an mak aproveita hodi goja ema seluk nia terus.
Maria da Conceição Simões ho idade 55, origen husi Turiscai Suku Caimauk, da-daun hela iha aldeia Kakeu-Laran Suku Becora Posto Kristu-Rei, durante tinan 10 ona faan ai-fuan no tutur batar daan, haleu sidade Dili laran buka osan hodi sustenta nesesidade uma laran no familia.
“Batar ne’e ha’u ba sosa iha Taibessi lori mai daan tiha pois tutur ba faan iha Colmera, Largo, batar ne’e ha’u faan fulen ida sentavus 50, maibé haree mos tempu, tempu di’ak ema sosa hotu, se la hotu triste ha’u lori fila uma ami,” Maria haktuir lia hirak ne’e hafoin hasoru malu ho jornalista Lafaek News Mateus Felisberto de Deus iha Becora (STM) wainhira familia saudozu Xavier ne’e tutur hela batar daan atu lori ba faan iha Lecidere.
Família saudozu Xavier ne’e haktuir, batar daan ne’e mos folin tuir tempu de’it, iha loron balun dala ruma la folin, maske la’o haleu Dili ema la sosa, wainhira batar daan ne’e la folin ona, Maria deside faan hikas ai-fuan seluk iha sidade Dili nune’e bele hetan netik osan rahun hodi kontinua hatutan moris.
wainhira la’os tempu batar nian ha’u faan kualker ai-fuan de’it, tanba moris depende de’it ba sasan ne’ebé ha’u faan, dala ruma ha’u fase ema nia ropa foer sira no hamos du’ut hodi hetan osan,” Maria espresa ho lian halerik iha momentu furak ho jornalista Lafaek News ne’e.
maske moris iha situasaun difisil, maibé la rende hanesan uluk nia aman sir aluta hasoru invazor sira iha 1975, uluk luta ba rai Timor nia independénsia, maibé ohin loron kontinua luta ba kabun, bastante labele tane liman no labele na’ok hanesan iha situasaun funu ne’ebé liu ona ba kotuk.
“Ha’u kbi’it laiha atu haruka sira ba universidade entaun sira hotu la kontinua ba Universidade, rai ne’ebé agora da-daun ha’u hela ba ne’e mos amesa atu naksobu, osan rahun ne’ebé ha’u hetan husi batar daan ne’e, rai-hamutuk hodi sosa simente kaut ida ka rua hodi hada foundasi atu ha’u nia uma atu labele monu ba rai-naruk,” dehan nia.
Iha fatin hanesan Adolfo Martins nudar oan husi Maria, haktuir nia rasik bandu nian inan atu labele faan batar la’o haleu sidade, maibé nesesidade uma laran mak obriga tenke faan duni atu bele hetan bele hatutan netik moris.
“Ha’u nia mama ne’e lakohi atu tane liman, buat hotu nia hakarak ninian rasik ami oan sira bandu mos labele ami bandu nia hatan dehan imi sira ne’e iha fen ona, ha’u husu tan ba imi hirak mak imi atu hare tan ba imi nia oan sira, tenke ba faan hodi sosa hahán, maibé oan ami mos sempre akompana nia sosa sasan iha Taibessi pois nia faan hotu ami mos, ba buka tuir nia hodi akompana fali mai uma,” oan mane husi familia saudozu Xavier ne’e haktuir.
Ema ne’ebé uluk luta sura ho liman fuan, ikus hetan liberdade ema barak mak goja iha maluk ne’ebé uluk lakon familia no lakon hela fatin ninia leet, la sees husi lia-fuan traidor sai heroi, no heroi sai fali traidor iha rai ne’e nia liberdade.
Pedro de Araujo hanesan Xefe aldeia no nudar mos viziñu ho Maria da Conceição, nia rekonese familia proklamador ne’e hanesan povu ne’ebé durante ne’e moris iha susar laran, nudar autoridade sub-mete ona pedidu ba MSSI atu tulun inan Kbi’it laek Maria, maibé to agora la hetan resposta ruma husi governu.
“Ha’u mos haree ho matan realidade moris ho kbi’it laek mana ne’e iha laen i no mos iha oan, durante ne’e lori nia esforsu rasik, faan batar ne’e hodi sustenta nia uma laran foin lalais inundasaun ne’e iha ema balun ne’ebé fo ona besi hodi hada uma, maibé kona-ba hahan seidauk, ha’u hatama ona proposta hodi husu apoiu ba Kbi’it laek Maria da Conceição, maibé ema la konsidera ita proposta ne’e, ha’u ba husu tuir proposta sira dehan hein hein de’it, más too agora laiha rezultadu, sira konsidera ami autoridade lokal hanesan tixu ne’ebé hamos sira kosar so’e tiha ba rai,” Xefe aldeia ne’e haktuir.
Observasaun Lafaek News iha inan Maria da Conceição ninia rezidensia nota katak fatin ne’ebé inan feton ne’e ho nia familia hela ba, iha hela risku laran, bainhira iha udaan boot, ameasa rai bele monu, no foos uituan maki ha balde laran, maibé menus da-daun ho razaun loron rua ona Inan feton Maria kondisaun moras nune’e labele faan batar daan atu hetan osan hodi sosa fali foos.
Entretantu, too notisia ne’e hatun hetan reklamasaun husi familia saudozu Francisco Xavier do Amaral katak, inan feton Maria da Conceicao Simoes, familia duni ho avo Xavi, mas la’os Avo Xavier nina maun rasik nia oan, maibe hanesan familia de’it.
Jornalista : Mateus F.de Deus
Editor : Agapito de Deus
