Lafaek News—Koordenadór Jerál Covid-19, Odete da Silva Viegas, Rekuñese kazu Covid-19 ne’ebé númeiru kazu pozitivu sa’e makaas kada sa’e kada loron, tanba ne’e husi parte ekipa saude no ambulánsia sente hasoru difikuldade kona-ba situasaun refere.
“Rekuñese tanba kazu pozitivu sa’e makaas iha loron ba loron ho ida-ne’e difikulta sira nia servisu, difikuldade sira ne’ebé mak ekipa liu-liu pilares 7, 3, 5 infrenta iha baze, ita hare’e iha inisiu numeru mosu ida ida ladun barak fasil ba ekipa atu organiza iha terenu, pois fulan rua mai tan kazu ne’e aumenta makaas sa’e to’o atus ida liu, pozitivu iha loron ida nia laran, signifika katak movimentu servisu ambulánsia pilar 7 hasoru difikuldade ida-ne’e,” Deklara Koordenadór Jeral Covid-19, Odete da Silva Viegas iha salaun Novu Turismu, (kinta 06/05/2021).
Tanba ne’e nia informa ba públiku katak maluk sira ne’ebé detetadu pozitivu ne’e iha duni informasaun barak kona-ba kazu pozitivu maibé pessoal saúde sedauk foti, maibé horseik nia parte organiza ona atu foti.
“Horseik no ohin, ami organiza ona hare’e direitamente oinsa atu foti kazu sira, entre pilar 2 tenke hato’o komunikasaun ba ema sira ne’e ba pilar 3, 5, ho 7,” tenik nia.
Enkuantu nia dehan, mekanizmu ne’ebé fasil ba pesoal saúde uza maka informasaun kona-ba kazu pozitivu nia diresaun no naran, nia parte sei fahe ba ekipa tolu ka haat ho transporte la’os ambulansia de’it, tanba ambulansia komunidade barak lamenta ho nia lian, tanba ne’e sei uza mos mini bus.
“Kazu asintomatiku la isin manas ho mear ami sei uza mós transpotre Mini bus atu foti ema sira ne’ebé positivu, ambulánsia ne’e ami tau ba pasiente ne’ebé mak ho moras grave ou kazu sira ne’ebé moderadu hodi ba Ospital Nasionál Guido Valadares (HNGV) detekta transfere mai iha Vera-Cruz, tanba Ambulansia ne’e ami uza hanesan alternativo ida, ida ne’e bele minimiza populasaun sira nia paniku iha tempu pandemia global,” nia hakotu.
Jornalista: Rita Moniz
Asisten Editór : Pedro de Almeida
