Lafaek News—Negosiante Octavianos Thal, ne’ebé hetan agresaun fíziku husi oknum PNTL na’in rua iha Selamat datang Tasi-Tolu, loron domingu (23/05/2021), empresta ema nia osan maka sosa nu’u laloir hodi fan, maibe seidauk bele selu, tanba nia kondisaun ladún di’ak ona hodi kontinua fan nuu laloir.
Haree husi oknum PNTL nia agresaun fíziku ne’e difikulta tebes negosiante Octavianos Thal, tanba atividade negosiu ne’ebé nia hala’o husi fan Nuu ne’e, empresta tutan ema seluk nia osan hodi sosa Nuu, maibé la hatene atu lori saida mak bele selu fali ema nia osan empresta ne’e, tanba nia kondisaun sei iha susar laran.
“Ha’u foti ema nia osan privadu $1.500 agora tama fulan 4 ona osan funan $2.25 seidauk stór remata, no osan inan $1.500 seidauk stór tomak” espresa Octavianos ba Lafaek News iha nia rezidénsia bairo João Paullo ll Tasi-tolu foin lalais ne’e.
Liu husi atividade negósiu Nuu mak sai hanesan nesesidade ekonomia uma laran no osan funan bele selu fila-fali ema nia osan ne’ebé Oe-kusse oan ne’e empresta.
Realidade hatudu ba Negosiante ambulante nu’u, Octavianos Thal idade (25) husi Nítibe Oe-kusse, da-daun ne’e hela ho nia kaben Dalia da Costa (24), no nia alin nain haat iha bairo João Paullo ll, aldeia 12 de Outubro Postu Dom-Aleixo, suku Komoro, hodi buka moris sustenta uma laran, nune’e depende moris iha motor roda tolu hodi sosa Nuu laloir fan iha dalan ninin sidade Dili dezde 2019 too 2021 ohin loron.
Vítima ne’e espresa, durante iha serka sanitária ne’e nia empresta ema nia osan privadu $1.500 hodi fila liman faan nu’u, no osan $1.500 ne’e ho nia fulan totál $2.25 ho nia prosesu selu nian durasaun fulan 4, ne’e duni kada fulan nia sempre stór uluk osan funan oituan-oituan depende ba kbiit, maibé osan isin $1.500 ne’e seidauk selu hotu.
Tanba ne’e, hahú husi akontesimentu iha Tasi-Tolu, impede labele selu osan empresta kada fulan no kontinua sosa Nuu husi nia klientes sira husi munisípiu Likisá, tanba hetan agresaun fíziku husi membru PNTLrezulta nia kondisaun saúde ladun diak hodi hala’o atividade hanesan baibain.
“Fulan ida ne’e ami osan laiha, entaun deside atu faan tia tiga roda ne’e hodi selu fila-fali ema nia osan ne’ebé ami empresta, tanba atu kontinua faan nu’u maibé nu’u folin laiha no ema atu olaraga hodi sosa nu’u maibé polisia sira duni hotu, no dalan mós sei taka hotu, lahatene ba oin ha’u atu buka tan servisu saida” espresa Octavianos Thal.
Dalia da Costa, nu’udar kaben husi vítima Octavianos, akresenta, relasiona ho membru PNTL baku nia laen ne’e, nu’udar fen sente triste tebes tanba nia laen ba buka osan hodi sustenta nesesidade uma laran, maibé polísia baku nia see mak atu selu ema nia osan inklui sustenta uma laran, maibé justisa sei iha no justisa hanesan ba ema kiik no ema boot sira.
“Ha’u triste tanba nia sai ba buka osan hodi hola hahan, polísia baku fali nia, no tangal 28 ema mai husu osan, ami osan laiha tanba nia moras loro-loron toba de’it sé mak atu buka osan” informa Octavianos nia Fen Dalia da Costa.
Jornalista : Juvita dos Santos
Editór : Agapito de Deus
