Harii Sosiedade ida ne’ebé hatuur iha justisa sosiál, hodi hakiak rai nain sira nia moris di’ak ho isin no klamar nian (K-RDTL Artigu 6 Objetivu Estadu Alineia E).
Oinsá atu refleta ba tema jerál iha leten ida ne’e?. ha’u sei la temi teoria oin-oin iha hakerek ida ne’e, maibé refleta ba teoria dezenvolvimentu umanu, ligadu ho Estudu Masteradu Administrasaun Publiku (UNPAZ), iha materia jestaun rekursus humanus nian.
Ita ligadu mós ba teoria dezenvolvimentu sosiedade (Licenciatura sosiologia sira nia teoria). ita ligadu ba teoria siensia ekonomia no estudu dezenvolvimentu iha materia kona-ba ekonomia rekursus humanus, temi katak, ema umanu iha strutura tolu(3) maka hanesan; ema maka iha isin klamar no espíritu, signifika katak, dezenvolvimentu ne’e sosiál ekonomia atu hatuur povu iha justisa sosiál ida ke metin tenke produs ema matenek iha sira nia isin, klamar no espiritualmente.
Tema ne’ebé mensiona iha leten temi mos justisa sosiál, entaun saida maka justisa sosiál, palavra sosiál refere ba ema umanu. ha’u nia perspetiva katak, ema internalmente la matenek iha isin klamar, no espiritualmente ne’e konseitu justisa sosiál ne’e seidauk moris iha internalmente estrutura umanus ne’ebe temi ona iha leten ba ne’e.
Atu hatuur justisa sosiál ne’ebe loos tebes, estrutura umanu isin klamar no espíritu tenke unidade internalmente iha korpu dezenvolvimentu umanu, purké justisa sosiál tuir reflesaun ida ne’e, katak, ema nia isin klamar no espiritualmente tenke iha unidade entaun, justisa sosiál tenke hahú husi ema nia an rasik maka ba ema seluk no komuidade no sosiedade em jerál.
se ita ko’alia justisa sosiál, variabel importante maka internalmente ema umanu bele jere nia moris ho justu, la’os ema seluk maka fo fali justisa ba nia an rasik, purké kompozisaun justisa sosiál bele temi dame, domin, ekonomia ne’ebé jere ho balansu iha uma laran, kuiñese an rasik ho di’ak, hatene hadamen nia an iha isin klamar no espiritualmente, laiha egoismu, arogante, foti an no hahalok negativu sira seluk produs enerjia negativu umanu.
Maibé, dala ruma no dala barak, faktus da-daun hatudu katak, ema barak halerik hela ba justisa, faktus hatudu husi ne’ebé ema buka servisu iha fatin-fatin, buka dalan ba servisu iha nasaun seluk hanesan Korea, Inglaterra, Austrália no seluk tán, ne’e atu buka justisa ekonomia ba nia moris rasik. ita ligadu ba númeru dezempregu ne’ebe boot porsentu 11 (11%), tanba asumsi ekonomia makro ne’e dehan dezempregu normal ne’e tenke porsentu 3 (3%), entaun númeru dezempregu laiha balansu.
Tanba, nesesisadade ekonomia ida ne’e variábel fundamentál atu hatuur justisa sosiál iha família ida iha nasaun no estadu ida, akresenta katak, númeru dezempregu porsentu 11 (11%) la redus ba porsentu 3 (3%), ne’e presaun psikolójia iha sosiedade família laran la saudável mentalmente, ida ne’e estrutura umanu isin klamar no espiritualmente laiha unidade ba malu. iha parte seluk tan tuir mai.
se maka atu kontribui hatuur justisa sosiál, iha ne’e ita ko’alia kona-ba objetivu estadu, entaun papél estadu atu hatuur justisa sosiál iha sosiedade, entaun estadu mai husi ne’ebé estadu iha nasaun ida harii husi povu bele interpreta Konstituisaun (RDTL) artigu 1 no artigu 2, povu fo fiar liu husi maneira Demokrátiku eleisaun Jerál Presidensial no Parlamentu Nasionál, atu nune’e, bele ezekuta Objetivu Estadu Artigu 6 ba iha dezenvolvimentu sosiál Nasaun ida ne’e (Rai-Timor), ida ne’e ligadu ba variabel dahuluk ba tema iha leten, ita ligadu fali variabel tuir mai.
iha parte seluk ita ko’alia mos variabel sosiál seluk ida ne’e kona-ba oinsá ita hodi hakiak rai nain sira nia moris di’ak ho isin no klamar nian, Maluk Timor-oan sira, repete tan katak, ita lee didi’ak objetivu Estadu Artigu 6 Alineia E, ne’e, ita kuiñese katak, estadu ne’e (RDTL), la’os ko’alia de’it kona-ba hakiak rai nain sira nian isin maibé, Estadu mós tenke hakiak rai nain Timor-oan sira nia klamar. ne’e ko’alia kona-ba dezenvolvimentu spiritual I klamar ema nian.
perguntas?. se maka atu kontribui hakiak rai nain sira nia isin ho klamar?. ita fahe ba variable tolu, kona-ba aihan isin nian ida ne’e Estadu RDTL nia responsabilidade kria kampu de trablhu, no fo oportunidade ba Empresa I kompania sira atu kria servisu tuir Kontituisaun RDTL Artigu 138 organizasaun Ekonómiku sira atu hola papél fo han ema nia aihan isin nian, ne’e ligadu ba aihan kabun isin di’ak nian. entaun maske kampu de servisu sedauk natoon tuir ema nia moris kontente nian, maibé ita nafatin esforsu atu kria.
oinsá kona-ba hakiak rai nain sira nia klamar no espíritu, ida ne’e, Estadu nia papél atu halo programa liu husi relijiaun sira, tanba no instituisaun fira nain nian. Artigu 12 K-RDTL ko’alia kona-ba relijiaun sira no fiar oin-oin iha Rai Timor laran. signifika Estadu RDTL fo ona oportunidade ba ema hotu atu hakiak nia klamar no espíritu liu husi instituisaun relijiaun no fiar oin-oin sira seluk para buka hetan aihan klamar no ispritual nian ba korpu humanidade sosiedade nian.
maibé oinsá ho implementasaun liga ba kualidade programa hakiak Rai Nain sira nia isin ho klamar. kona-ba aihan isin nian, Lideransa sira Estadu no Nasaun Timor esforsu kria servisu nafatin. oinsá hakiak aihan klamar no spiritual nian, ne’e lideransa fiar nian, ho relijiaun sira atu responsabiliza hakiak rai Nain Timor oan sira nian klamar no espíritu atu bosu didiak hodi komplementa moris isin nian, ema nia isin klamar no espíritu bele bosu no hetan matenek ne’ebé hanesan hodi kontribui ba kualidade sosiedade iha Rai Timor.
atividade no programa atu fo hakiak ema nia klamar maka tradisaun igreja relijiaun Katólika nian maka Fiar ba Maromak Santissima Trindade, bain bain Sinai hahú halo hodi padre filho no espíritu santu sira nia naran amen. ne’e sinais aihan klamar nian. maibé la too, aihan klamar atu bosu liutan maka Jesus nia liafuan no futar isin, Nain Jesus Cristu nia Futar Isin no Ran ne’e simu Liu husi Misa Eukaristia Santa, ida ne’e tradisaun relijiaun Katólika atu fo han aihan klamar ba sarani(batizadu/a) sira. maibé oinsá ho Jesus nia liafuan hanesan iha Biblia Laran, sarani sira pratika loron-loron ka lae?.
Tradisaun relijiaun Katólika nian atu hetan ai-han klamar nian maka kontribuisaun boot se maka sarani ona tenke haklaken Biblia no halo karidade hodi bele haboot liután sira nia vida spiritual nian. ida parte ne’e realidade ladun masimu. sarani barak la pratika. entaun se maka sala?. ligadu ba kualidade klamar no spiritual nian.i dala ruma Estadu Tenke turun tangan atu fo han ema rai nain sira nian klamar no spiritual. Tanba, aihan klamar nian maka kompletamente kontribui ba kualidade dezenvolvimentu umanu iha sosiedade Rai Timor nian.
K-RDTL Artigu 12, laiha relijiaun ofisial, ha’u nia hanoin artigu 12 ne’e Estadu RDTL tau programa atensaun masimu ita produs hakiak rain nain sira nia isin ho klamar ho didiak kedas.
relijiaun sira seluk hanesan kristaun protestante, relijiaun Budha, Hindu Islamiku no atividade Relijiaun sira seluk kontribui makaas tebes ba aihan klamar nian iha Rai Timor.
kolega pendeta ida ami dada lia nia dehan mai ha’u, kolega, ami nia relijiaun protestante ne’e aihan klamar ne’e kualidade principal, tanba se maka tama protestante tenke hatene Biblia no haklaken Biblia. ne’e Misaun Nain Jesus Cristu nian husik hela mai ita. Kolega protestante ne’e hatutan ami nia relijiaun ema bele sai pendeta bele forma família, entaun ami matenek kona-ba Maromak nian no mós kona-ba ekonomia sosiál Mundu nian ami kompleta.
kolega sira relijiaun Islamiku mós dada lia ho ha’u, kona-ba sira nia komunidade Islamiku, regras maka sira nian komunidade Islamiku tenke domina Alquran, bele sai Haji no Bele hola forma família, entaun sira iha knaar forma família no iha oportunidade tenke hanorin Alquran ba sira nia família too hetan aihan klamar nian ne’ebé kualidade. hanesan mos relijiaun sira seluk.
kolega nain rua relijiaun protestante ho Islamiku ne’e hatutan ema nia isin ho klamar kuandu matenek hanesan bele kompleta malu iha kualidade moris loron-loron. bele sai lideransa ne’ebé kualidade tebes iha futuru mai. Maibé matenek deit iha aihan isin nian maibé aihan klamar nian ita la matenek ida ne’e problema kualidade lideransa mós iha problema boot iha futuru mai.
intensaun boot husi hakerek ida ne’e, maka katak, Artigu 6 Objetivu Legal Estadualineia E (K-RDTL), ema hotu tenke tau atensaun ba programa balun, atu haforsa malu, tantu ONG sira, Relijiaun Sira no tradisaun fira nain sira seluk atu kompleta liutan no hadiak di’ak liutan kualidade implementasaun programa hodi kontribui ba estadu atu hakiak rai nain sira nia isin ho klamar iha dezenvolvimentu sosiedade Rai Timor nian iha futuru mai.
iha atensaun boot ba relijiaun Katólika, ema Timor oan Maioria Relijiaun Khatoliak tantu ukun nain Estadu sira, Maibé Maromak nia liafuan ne’ebe sira Sarani dadaun ba sinais Nain Jesus Cristu nian sira ladun implementa ho didiak, lahatene rajaun saida, ezemplu ladun Lé Biblia barak, la akompanha evanjelhu loron-loron iha sira nia mori nuudar aihan klamar nia hodi kompleta aihan isin nian. husi esperiensia pratika komunidade relijiaun Katólika nian, ha’u laiha dadus certeja maibé hanesan esperiensia pratika loron-loron nota katak, violénsiadoméstika, no kasu risku sosiál sira seluk, kuaje komunidade akontese ba komunidade relijiaun Katólika maka barak, ne’e tanba sa?, ha’u resposta badak maka tanba aihan klamar no spiritual nian maka menus tebes, klamar no espíritu kiak no mukit tebes no hamlaha krekas la fo han. tanba la kumpriende saida maka aihan klamar nia, presisa formasaun spiritual iha família no komunidade Rai Timor nian.
esperensia hatudu misa sai mai fila ba uma tolok malu nafatin, konta malu nafatin tradisaun esplorasaun sosiál ekonomia ligadu ho adat istiadat barak nafatin, diskriminasaun, maibé ne’e tanba falta aihan klamar nia, laiha formasaun ne’ebé adekuadu ba família Katólika sira.
relijiaun hirak ne’e presisa kompleta malu, atu fo han hakiak rai nain Timor oan sira nia klamar hodi kontribui ba haforsa objetivu Estadu nian.
hakerek ida ne’e fiar katak, sedauk kompleta di’ak, maibé maluk sira bele interese hakerek tutan tan hodi kompleta referensia seluk, haríku liutan ba lee nain sira.
maluk sira ita sei kompleta malu iha hakerek tuir mai hodi produs tradisaun hakerek no lee barak iha rai Timor. Obrigadu wain tebes.
haforsa tan, hakerek ida ne’e atu refleta katak, Artigu 6 Objetivu Legal Estadu ida ne’e, ema hotu kontribui implementa ho di’ak ona iha Dezenvolvimentu sosiedade Rai Timor ou oinsá sedauk!.
husi kontiudu laran ne’e, ligadu ho esperiensia prátika loron-loron, fakta empiriku tebes.
ha’u sujere maluk hakerek nain sira balun iha referensia di’ak liutan bele hakerek di’ak liutan hodi publika iha jurnal internasional Akadémiku ligadu tema Objetivu Estadu Nian. hodi kompleta hakerek ida ne’e. tanba kreatividade hakerek ema idak-idak nian iha matadalan la hanesan kona-ba konseitu dezenvolvimentu umanu atu hakiak ema nia isin ho klamar iha ita nia sosiedade Rai Nain Timor-Leste. Efata.
Aluta Tali-Takum Miserikórdia
Hakerek nain : Damião Da Silva Pereira
