Lafaek News– Observadór Internasionál husi organizasaun Rede Orgaun Eleitorá (ROJAE) hosi Comunidade País Língua Portugés (CPLP) hamutuk ema na’in 13 sei halo observasaun ba eleisaun parlamentár ne’ebé sei monu iha loron 21 fulan Maiu tinan 2023.
Vise Prezidente Komisaun Nasionál Eleisoens (CNE), Domingos Barreto hateten, ohin observadór internasionál husi organizasaun Rede Orgaun Eleitorá (ROJAE) Comunidade País Língua Portugés (CPLP) mai atu kumprimenta Prezidente Repúblika no rona mós lia menon husi Xefe Estadu kona-ba preparasaun eleisaun parlamentár ne’ebé sei monu iha 21 Maiu.
“Ekipa delegasaun ne’e foin to’o mai horsehik loron 17 fulan Maiu tinan 2023 ne’ebé sira seidauk hatete buat barak, tanba sira foin primeira vez mai observa Timor Leste nia eleisaun parlamentár iha 21 Maiu, 2023, delegasaun hamutuk 13, no sei fahe ba Postu Administrativu sira, sei koloka ema na’in ida-idak,” informa Vise Prezidente CNE, Domingos Barreto ba jornalista sira hafoin remata enkontru ho Prezidente Repúblika José Ramos-Horta iha Palasiu Prezidensiál Bairu-Pite kinta (18/05/2023).
Fatin hanesan, Observadór Internasionál ROJAE-CPLP husi Komisaun Nasionál Eleisaun Kabu Verde, Cristina Leite, dehan, ohin observadór internasionál hala’o vizita kortezia ida ho Prezidente Repúblika antes hala’o observasaun ba eleisaun parlamentár ne’ebé sei monu iha loron 21 fulan maiu tinan 2023.
“Ami nu’udar entidade ne’ebé ami simu kortezia husi Prezidente Repúblika, tanba ne’e laiha asuntu ruma ne’ebé ami diskuti ho Xefe Estadu,” dehan observadór internasionál ROJAE-CPLP Cristina ba jornalista.
Enkuantu, iha enkontru ne’e Prezidente Repúblika José Ramos-Horta informa, observadór internasionál mai haree kondisaun país Timor Leste atu halo observa ba eleisaun parlamentár 21 ho preparasaun.
Jornalista: Rita Moniz
Editór: Acacio Pinto