Lafaek News–Faluk Anita Soares ho idade 66, husik hela nia oan feto nain haat iha Suku Fatubosa Postu Administrativu Aileu-Vila munisípiu Aileu, mai faan modo iha merkadu Manleuana hodi responde nesesidade uma larann.
Ha’u mai fa’an sasán hirak ne’e durante tempu Indonézia , uluk ne’e ha’u tutur la’o ain mak ba fa’an de’it, maibé agora ha’u tur fali iha fatin ne’e kleur ona , ita tur to’o baruk de’it husi dadeer madrugada tuku 5, to’o fali kalan tuku 6 ha’u fila ba uma, tur hein ema mai sosa folin dólar 2 de’it hanesan ne’e, di’ak ida liu dólar 5, fa’an husi loron to’o fali kalan paseinsia ha’u fila ba uma ho osan dólar 5, ne’e de’it,” hateten inan faluk Anita Soares ba Lafaek News, iha merkadu Manleuana suku Komoro Postu Dom Aleixo, foin lalais ne’e.
Inan Faluk Anita Soares ne’e hateten katak fa’an modo ne’e dezde tempu Indonézia to’o agora, fa’an sasán ne’e komesa husi madrugada tuku 5 to’o fali kalan tuku 6 mak foin fila ba uma deskansa.
Ha’u faluk ona, idade mós aumenta boot ba bei-beik, maibé la sente kolen no baruk, haforsa an nafatin hodi fa’an sasán ne’e hodi sustenta nesesidade uma laran no atu dudu oan sira ba eskola, labarik sira mós eskola hela, ha’u la fa’an karik ha’u ba buka osan iha ne’ebe mak uza ba labarik sira nia eskola, eskola presiza ona lapis lapijeira buku, labarik sira mós agora da-daun iha ona nivel sekundaria, ida tuir ne’e iha Pre-Sekundaria, nain rua mak sei iha primaria sira nain haat ne’e eskola hotu iha foho,’’ katak ina faluk ne’e.
Nia esplika ho laran todan tebes tanba nesesidade obriga inan faluk Anita Soares tenke husik hela oan sira hela hamutuk ho nia alin iha foho, durante tinan barak ona inan faluk mai fila-liman hodi sustenta oan sira nia futuru.
Sasan ne’ebé ha’u fa’an ne’e mós ha’u sosa tutan mai fa’an, sosa ema nia ho folin dólar 7, ba leten mai fa’an tutan fale hetan mak dólar 5, de’it nia inan ami sosa ba dalaruma la to’o, ha’u tur fa’an nafatin to’o hotu mak ba sosa tan hodi mai fa’an loron-loron, ita fa’an sasán hirak ne’e mak osan iha netik ita nia liman , maske la barak maibe uituan iha netik, fahe tan ba rua ida rai hamutuk hodi nune’e to’o fulan karik haruka ba labarik sira iha foho, balun ha’u uza ba sosa netik hahán foos la to’o saku ida mós,’’ haktuir inan faluk ne’e ho triste.
Estajiada : Juvita Ximenes
Editor : Agapito de Deus
