Bobonaru-(Lafaek News)—Nesesidade báziku iha uma laran obriga avó feto Angelina da Cunha ho idade 60 tenke lori modo fan iha merkadu hodi ajuda oan mane iha aspeitu ekonomia uma laran.
Avo Angelina da Cuinha Moris iha suku Batumanu Postu administrative Atsabe munisípu Ermera da-daun ne’e hela iha Ramaskora suku Odomau postu administrativu Maliana munisipiu Bobonaru.
Avó faluk Angelina maski ho idade avansadu tenke atividade negósiu kiik ne’e ho razaun nia kaben ho Agustino Berebato, fila on aba mundu seluk hafoin hetan tiru husi TNI iha tinan 1975, no husik hela oan nain lima hamutuk ho inan faluk ne’e.
“Durante ne’e Densio mak sempre sosa hahán ami han entaun ha’u sente an maka’as bainhira la halo buat ida depois hein han de’it tanbá ne’e ha’u tenke mai fan modo hodi ajuda oan mane sosa lisuk hahán iha uma laran,” dehan Avo Agelina ba jornalista Lafaek News iha merkadu Maliana foin lalais ne’e.
Modo produtu lokál hirak ne’e Avo Angelina ku’u iha natar laran tuir mai lori fan iha merkadu maske modo ne’e la dun folin.
“Tur loos de’it iha uma mos sente ladún di’ak entaun dadeer ha’u lori modo mai fan iha merkadu ema la sosa to’o meudia lori fila ba uma depois lokraik kontinua mai fan fali, karik ema sosa modo ne’e osan modo nian sosa fali mina masin masako,” Avo Angelina Esplika.
Inan faluk Angelina haktuir nia istória katak, durante ne’e oan feto sira la haree nia tanba sira hela dook hotu dala ruma tinan foun mos la vizita husi nia oan feto nain haat ne’e.
“Ha’u nia oan ida hela iha odomau ne’e mak tempu di’ak nia mai vizita ha’u maibé sira na’in tolu ne’e hela dok hotu ne’ebé sira nunka mai haree ha’u no la haruka took osan, foos, mina no masin mai ha’u,” Avo Angelina konta.
Avo Angelina hatete, nia mós simu ona osan terseira idade nian, osan ne’e hodi sosa de’it nesesidade uma laran, maibé subsídiu 100 nian avó nia la simu.
Jornalista : Orlando Magno
Editora : Nelya Barros
