Lafaek News—Koordenadór Eskola Bázika Filiál (EBF) Nú-5 Mota-Ulun , suku Lahane Oriental postu administrativu Nain-Feto, José Savio, informa too ohin loron seidauk hadia iha fasilidade no kondisaun eskola grave tanba laiha orsamentu.
“Ami iha hanoin atu halo manutensaun ba fasilidade eskolar sira, maibè susar uituan, tanba durante ne’e ami so laran metin de’it ba osan konsesoens eskolar nian, se ita kompara ho uluk indonézia nia tempu ne’e di’ak liu tanba iha kaixa eskola no mós konsesoens eskolar ne’ebè mak bele suporta ita hodi dezenvolve eskola ne’e sai furak liu tan,” dehan José ba Lafaek News iha nia knaar fatin Taibessi, Kuarta (25/11/2020)
Nia hatutan dezde eskola ne’e harii iha tempu Indonézia to’o agora Ministériu Edukasaun inklui edukasaun munisípiu halo ona observasaun ba eskola refere, maibé infelismente observasaun hirak ne’e la hatudu resposta pozitivu, kestaun impase polítika ne’ebè mak agora da-daun Timor-Leste enfrenta.
“Ha’u husu ba governu Timor-Leste atu tu’ur hakmatek hodi halo dezenvolvimentu ba setór hotu liu-liu setór edukasaun, se karik governu la hakmatek maka edukasaun iha Timor-Leste sei la ba oin”, hakotu nia, dehan Nia.
Entretantu iha sorin seluk koordenadór Civil Society Education Partnership(CSEP) José de Jesus, hateten CSEP halo monitorizasaun ba ezekusaun fundu konsesoens eskolar ne’ebè mak fó ba kada eskola, kada estudante $1.00 dollar iha fulan ida ba eskola ida, pruzemplu iha eskola ida akumula 100 ital estudantes ne’e signifika fulan ida eskola refere simu $100.00 dollar.
‟Ami konsidera Ministério Educação Juventude Desporto(MEJD) fraku iha monitorizasaun ba distribuisaun orsamentu fundu konsesoens eskolar ne’ebè fó ba kada eskola, tanba maioria husi orsamentu ne’ebè mak simu husi diretór da eskola nomós koordenadór da eskola sira depois de simu tiha osan ne’e sira la lori ba eskola, maibe intensaun lolos husi konsesoens eskolar ne’e hodi hadia no kompleta ba nesesidade eskola ninian hanesan sosa livru, halo manutensaun ba karteira sira ne’ebè mak at, maibe infelismente lae”.
Nia mós akresenta liu tan katak, infrasoens hirak ne’e mosu tanba fraku iha monitorizasaun, tanba ita la hatene sira iha relatóriu kona-ba Konsesoens eskolar nian mai husi diretór da eskola no koordenador eskola sira ka lae?, hakotu Nia
Jornalista : Princess Silva
Editora : Nelya Barros
