Lafaek News—Nesesidade báziku uma laran sai hanesan problemátiku ba uma kain ne’ebé forma husi Antonio Soares Sarmento no Hermelinda Soares Sarmento, ho situasaun ne’e Hermelinda deside deve ema nia osan hodi sosa liis obriga oan daruak Adelino Soares iha ne’ebé foin atinje idade tinan 9 hodi fan hadulas merkadu Taibessi.
Orijen uma kain ne’e mai husi suku Katrai-Leten postu admnistrativu Letefoho, munisípiu Ermera, mai iha merkadu Taibessi antes atake pandemia covid-19, situasaun sei di’ak, maibé ikus mai estadu bandu sidadaun sira halo movimentu husi munisípu mai sidade Dili ho regras estadu emerjénsia no ikus ne’e limita ema hotu nia sirkulasaun ho serka sanitaria.
Ho situasaun ne’e fo impaktu tebes ba povu kiik sira husi area remotas too kapital Dili hodi buka moris, ema sira ne’ebé servisu iha instituisaun estadu nian kontinua goza ho sira nia saláriu fula-fulan, maibé povu kiik sira sakrifika an no kesi kabun hodi hein bainhira loos misaun governu liu husi serka sanitáriu ne’e bele remata lalais.
“Durante serka sanitaria no komfinamentu obrigatóriu nia laran ami nia foos laiha no han de’it maka fore-mongu, tanba fa’an nodo tahan teb-tebes ho liis mos ema la sosa,’’haktuir labarik ida ho idade tinan 9 ba Lafaek news iha merkadu Taibessi, domingu foin lalais ne’e.
Konsikuénsia husi regras hirak ne’e fó impaktu tebes ba labarik sira nia liberdade no direitu atu estuda, no inan-aman haluha tiha lei ne’ebé hakerek iha kódigu ba labarik iha kapitulu III, direitu ba edukasaun no prinsipiu kona-ba sistema edukativu iha artigu 25, labarik iha direitu ba edukasaun ida ho kualidade iha respeitu ba oportunidade hanesan, labarik sira hetan benefísiu husi profesores materiais dedikativu lokais instalasaun no rekursu adekuadu no goza ambiente ne’ebé favoravel ba ninia aprendizajen, maibé lei hirak ne’e la vale ona iha situasaun atual, tanba odamatan edukasaun ba labariks ira taka metin inklui inan-aman sira esplora labariks sira nia enerjia hodi atinje nesesidade iha uma laran.
“Durante ne’e eskola laiha no labele la’o, entaun ha’u ajuda de’it ama fan sasan iha merkadu Taibesi hanesan leba liis haleu areadores merkadu no dala ruma kalan ha’u ho ama toba de’it iha merkadu hodi hein sasan ne’ebé maka dader kontinua fa’an.’’ Dehan Adelino Soares iha entrevista ne’e.
Adelino idade 9, hala’o prosesu estudu iha eskola Ensinu Báziku 1,2 siklu Aituri-Laran ho klase II, hela iha Lahane hodi ba estudu iha eskola refere, tanba da-daun situasaun hotu falaun ho serka sanitaria no konfinamentu obrigatóriu, Adelino lakon nia direitu hanesan artigu kódigu labarik hateten, idade tinan 9 ne’e tenke ba merkadu hodi buka moris hamutuk ho ema boot sira ho ambiente diferente.
Iha intervista ho negosiante Adelino Soares hateten, nia fan li’is iha merkadu Taibesi durante serka sanitaria no komfinamentu obrigatóriu nia laran to’o agora, tenke ajuda nia papa ho mama, tanba nia papa sofre hela moras kumplikadu nune’e labele halo servisu.
‘’Liis ne’ebé maka ha’u leba ne’e hamutuk $. 8 no fan plástiku ida ho folin sentavus 25, dala ruma fa’an komesa iha dader 8:00 to’o lokraik hamrik ka hodi la’o hadulas merkadu laran hodi ema sosa,’’ nia hatutan.
Maibé, labarik tinan 9 ne’e dehan, sasán hirak ne’ebé nia fan hadula merkadu Taibessi laran, sosa husi osan ne’ebé nia mama empresta ema nia osan hamutuk dolar 9 ($. 9) hodi sosa fali liis mutin ho mean hodi faan atu bele hetan fila-fali funan hodi utiliza ba nesesidade uma laran, tanba serka sanitaria ne’e afeta direta ba sira nia moris liu-liu susar atu hetabn foos saka ida iha fulan ida nia laran.
‘’Ha’u nia ama foti ema nia osan $.9 hodi sosa liis ba ha’u fa’an iha merkadu tanba loron seidauk tama eskola di’ak liu faan de’it liis hodi ajuda ama ho apa hodi sosa hahan mai ami han,’’ katak Adelino.
Ikus husi entrevista ne’e, labarik ho idade tinan 9 ne’e hatoo nia mensajen ne’ebé importante tebes ba governu atu labele taka bei-beik eskola, tanba edukasaun di’ak bele garante nasaun nia dezenvolvimentu ne’ebé adekuadu iha futuru.
Jornalista : Manuel Andrade
Editór : Agapito de Deus
