Lafaek News—Prezidente Repúblika, Francisco Guterres Lú Olo, husu populasaun tomak iha Timor Leste, atu kontinua kumpre regra estadu emerjénsia atu evita transmisaun lokál husi covid-19.
Komunikadu imprensa ne’ebé lafaek news asesu husi media ofisial palasiu prezidente, domingu (30/05/2021), sita iha mensájen ba Parlamentu Nasionál husu autorizasaun ba deklara estadu emerjénsia dala ida tan.
Xefe Estadu preokupa tebes ho númeru kazu konfirmadu ho vírus Covid-19 nian sae babeibeik no diariamente afeta ema liu atus ida. Tanba ne’e, tenke iha kbiit ruma atu hapara tendénsia ida ne’e, situasaun iha Timor-Leste preokupante tebe-tebes ohin-loron, Bainhira Prezidente Repúblika hato’o mensájen ba Parlamentu Nasionál, Timor-Leste iha hela kazu ativu konfirmadu 2666 husi total 6014 sura hamutuk husi marsu 2020 no ema na’in-14 mak moras todan ho kauza oin-oin no mate no iha mos vírus Covid-19 nian.
Figuras públikas ho responsabilidade labele hateten katak sira hadomi Povu no preokupa ho moris-di’ak no saúde Povu nian maibé la kumpri fali regras bázikas ba protesaun hanesan distansiamentu sosial no uza máskara ka la respeita konfinamentu domisiliáriu, ho motivu ne’ebé de’it ka ho hanoin ba sira nia an de’it.
Halibur ho populasaun iha fatin públiku la hó máskara no lahó distansiamentu sosiál sei la kontribui atu hapara vírus corona maibé sei loke dalan ba vírus at ne’e hada’et liután husi ema ba ema. Saída mak populasaun hanoin ba nia obrigasaun atu haktuir konfinamentu domisiliáriu bainhira nia haree figura públika ida halibur ho ema ka la’o ba-mai ho ema atu haksolok-nia an de’it?
Prezidente Repúblika hateten iha ninia mensájen ba Parlamentu Nasionál bainhira husu autorizasaun atu renova stadu emerjénsia hahú husi zero oras, 2 juñu 2021 (kuarta-feira) to’o 23 oras 59 minutus 1 jullu 2021 (kuinta-feira), iha territóriu nasionál tomak.
Prezidente Repúblika preokupa tebes bainhira populasaun la respeita pesoál saúde ne’ebé tau matan no proteje sidadaun loron-loron, futuru saída mak País ne’e sei iha bainhira ema la respeita forsas defeza no seguransa? Futuru saída mak ita sei hetan ba foin-sa’e sira ne’ebé fila kotuk ba siénsia no monu lalais deit ba teoria nega de’ it no ba konspirasaun no rumor ne’ebé sira lee iha media sosial?
Prezidente Repúblika labele deklara fulan-fulan estadu emerjénsia no husu hela de’it sakrifísiu husi ema maibé Governu la konsege implementa medidas, Prezidente Repúblika fó-hanoin.
Prezidente Repúblika hateten, governu labele hases-an husi sasukat ka medida sira ne’ebé nia rasik dekreta no labele mós husik grupu ne’ebé de’it hasees-an no la respeita medida hirak ne’e. Governu labele ejize atu taka tipu estabelesimentu komersiál ruma no husik estabelesimentu balun husi tipu ne’e kontinua loke nafatin ba públiku. Governu labele dekreta konfinamentu domisiliáriu jerál, maibé husik fali ema irresponsável sira prátika desportu, partisipa iha konsertu muzikál, halo serenata kalan, ka la’o bá-mai iha ema hotu-hotu nia oin no Polísia haree de’it.
Repúblika Demokrátika Timor-Leste ne’e hatuur-an nu’udar Estadu direitu demokrátiku, soberanu, independente no unitáriu, bazeia ba vontade popular no respeitu ba dignidade ema nian tuir númeru 1artigu 1 husi Konstituisaun. la respeita órden no instrusaun sira husi autoridades kompetentes hodi aplika normas ba implementa estadu emerjénsia labele haree de’it ho perspetiva responsabilidade penal husi nia infrator sira.
“Se ita loke dalan nafatin atu la halo tuir medidas implementasaun estadu emerjénsia entaun ita tau Estadu-de-Direitu ne’e en-kauza, Ita tenke proteje Estadu-de-Direitu no kombate ameasa hotu-hotu ne’ebé mosu hasoru Estadu ne’e. Bainhira ita fó-dalan ba ema la respeita Direitu, ita sei permite barbarism moris,Prezidente Repúblika fiar katak ho apoiu ema hotu nian, Timor-Leste sei hakaat liu dezafiu boot no difísil ida ne’e. Iha istória Timor-Leste nian iha ezemplu oioin ne’ebé hatudu katak bainhira ita hamutuk, ita bele hakaat dezafiu, Prezidente fó-hanoin ba ita hotu,” PR Lú Olo hakotu. (*)
