Lafaek News-Relasiona ho notisia ne’ebé públika husi media online Lafaek News hetan responde hosi Ministériu Solidariedade Sosial Inkluzaun (MSSI) Munisípiu Dili konsege apoiu nesesidade baziku ba inan faluk Domingas.
Tuir tekniku MSSI Munisípiu Díli, Ruben Mendonca de Sousa, apoiu ne’ebé fó ba Kbiit laek Domingas, tanba hetan informasaun husi mídia online Lafaek News nia ho titulu “Tinan Tolu Faluk Domingas Moris Ho Ekonomia Laiha Dignidade”.
Hafoin haree informasaun husi media Lafaek News Diretór MSSI munisípiu Dili pasa kedas informasaun ba nia entaun hanesan tekniku sosiál postu administrativu Kristu Rei, munisipiu Díli nia kna’ar atu implementa programa MSSI iha baze.
Nune’e, simu informasaun husi Diretór MSSI, máka tekniku sira hamutuk ho autoridade lokal suku Kuluhun, postu administrativu Kristu Rei, munisípiu Dili halo kedas vizita domisiaria ba inan faluk Domingas to’o iha nia uma hodi haree direitamente inan faluk nia realidade moris.
“Ami ajuda ona fos saku rua no biti sia (9) ba inan faluk Domingas entaun fos ne’ebé ita apoiu ba sira ne’e to’o fulan tolu mak fos hotu sira sente susar nafatin entaun bele fó informasaun mai ami nune’e bele kontinua ajuda ba sira,” dehan tekniku MSSI Munisípiu Díli, Ruben ba lafaek news iha nia knaar fatin Bemori Dili, foin lalais ne’e.
Nia haktuir, MSSI Munisípiu Dili halo ona verifikasan ba inan faluk Domingas nia uma tanba ne’e ba futuru sira sei apoiu material konstrusaun, nune’e bele hadia nia uma.
Nia konta, Notisia ne’ebé lafaeknews.com publika ne’e loos tanba kbiit laek Domingas presiza duni ajudus husi parte governu.
“Familia kbiit laek ne’ebé media online lafaeknews.com públika ne’e ha’u haree lubuk ida tanba ne’e, hau hanoin ba futuru ami sei kordena diak liu tan ho Lafaek news, nune’e bele ba vizita kbiit laek sira nia uma hodi apoiu bazea ba problema ne’ebé sira infrenta,” nia promete.
Nia parte, aprezenta ona dadus no rekomendasaun lubuk ida iha MSSI munisipiu Dili kona-ba familia ne’ebé presiza ai-han no presiza ajuda materia konstrusaun uma nian.
“Konserteza ita sei ajuda inan faluk Domingas iha etapa segundu tinan 2022 tanba faze primeiru la’o tiha ona iha tinan ne’e,” nia garantia.
Durante ne’e MSSI Munisípiu Dili sira la’ós halo de’it apoiu ba kbiit laek ne’ebé mídia sira públika, maibé sira apoiu mós ba kbiit laek ne’ebé autoridade lokal fó ona dadus ba MSSIMD.
Iha sorin seluk inan faluk Domingas, sente kontente no apresia bainhira hetan vitiza no ajuda nesesidade bazika husi MSSIMD.
Nune’e, MSSIMD fo tiha ajudus ba Inan faluk Domingas, sira halo kedas vizita ba inan faluk Juliana Soares ne’ebé foin lalais mídia lafaek news publika notisia ho titulu “Kondisaun Uma La Permite Hahan Laiha Obriga Faluk Juliana Depende Hahan Husi Viziñu”.
Jornalista : Orlando Magno
Editór : Floriano Soares
