Lafaek News—Ministériu Saúde (MS) deteta tan kazu posztivu Covid-19 foun nain 84, Dili rejista pozitivu 11, total kazu covid-19 ne’ebé baixa iha sala izolamentu hamutuk 725.
“Kazu konfirmadu kumulativu (sura husi 21 Marsu 2020): 1452, Kazu detetatu foun ne’ebé relata iha dia 20 Abril 2021: 84 (iha Dili 73, iha Munisípiu seluk 11), husi total kazu detetadu foun ohin mane 45, feto 39, asintomátiku 76 (90%), sintomátiku 8, no kazu rekuperadu nain 32,” dehan kordenadór forsas tarefas ba prevensaun no mitigasaun surtu covid-19, Rui Maria de Araújo ba jornalista liu husi komunikadu imprensa, tersa (20/04/2021).
Husi total kazu detetadu foun ohin, 45 (53,5%) maka deteta tanba halo teste ho razaun atu halo viajen ka halo ona viajen ba Munisípiu hafoin deteta pozitivu, maski nune’e, sira ne’ebé rezultadu teste pozitivu, maioria sira nia hela fatin, iha duni cluster sira ne’ebé iha kazu detetadu barak.
Iha loron 20, Abril 2021, izolamentu Vera-Kruz iha kazu detetadu nain 9. Iha área obstetrisia nain 4, medisina interna nain 5, sira nain 4 iha obstetrisia, kategoria moderadu hotu, no nain rua tu’ur-ahi ona, nain rua seidauk.
“Sira hotu nia kondisaun estável, bebé nain 2 kaduak prematur no sei uza inkubador, bebé ida fali normal no estável,” tenik portavoz.
Enkuantu, sira nain 5 iha medisina interna, 1 grave, nain 4 moderadu, kazu 1 grave nafatin uza ventilador no aimoruk balun tuir protokolu ne’ebé Timor-Leste adopta, iha loron 19 Abril 2021, iha Munisípiu Covalima akontese insidente agresaun fizika husi ema ne’ebé detetadu pozitivu iha kuarentena, hasoru profisionál saúde sira,” nia akresenta
Koordenadór ne’e dehan, hanesan rezultadu, médiku responsável ba kuarentena iha Munsípiu Covalima kanek no tenki hetan atendimentu iha emergensia Hospital Referénsia Suai.
Tan ne’e, SIJK-SS lamenta hahalok violentu ne’ebé hatudu husi sidadaun sira hasoru autoridade saúde no mós insidente ne’ebé mosu iha dia 17 de Abril de 2021 iha fatin quarentena iha Aeroportu Suai, wainhira sidadaun sira ne’ebé detetadu pozitivu lakohi koopera ho autoridade saúde, hodi lori ba izolamentu.
Nnune’e mós sidadaun sira iha fatin kuarentena hanesan ne’ebé la pozitivu oferese rezisténsia, no ikus-mai forsa no servisu seguransa sira tenki aplika forsa hodi impoin kumprimentu norma ho regra ne’ebé vigora iha prevensaun no mitigasaun ba surtu COVID-19.
Ho situasaun ne’e autoridade administrativa, autoridade saúde, forsa no servisu seguransa iha Munisípiu Kovalima foti ona medida atu prevene labele akontese tan iha futuru.
Jornalista : Sandi Belo
Asisten Editór : Pedro de Almeida
