Lafaek News—Ministériu Saúde deteta tan kazu pozitivu Covid-19 na’in 12, nain 7 iha Dili no na’in 5 iha munisípiu seluk, inklui mós dotor ne’ebé durante fo atendimentu ba matebian (Armindo Borges) nia rezultadu teste PCR Pozitivu covid-19.
“Ohin kazu detetatu foun iha dia 13 Abril 2021: 12 (7 iha Dili, 5 iha Munisípiu sira seluk), husi total kazu detetadu foun ohin mane 4, feto 8, kazu foun ohin 100% asintomátiku no kazu rekuperadu laiha: 0 (zero), total kazu ativu: 556,” esplika kordenadór forsa tarefas ba prevensaun no mitigasaun surtu covid-19, Rui Maria de Araújo, ba jornalista sira liu husi komunikandu imprensa, Tersa 13/04/2021)
Portavoz hatutan, iha Munisipiu Dili, kazu foun 7. Nune’e, kazu detetadu ka pozitivu iha Munisipiu Dili husi dia 7 de Marsu 2021 (loron ne’ebé hahú deteta kazu iha cluster BTN II, Terra Santa, Madohi), to’o ohin, hamutuk hotu 844.
Iha munisípiu Likisa deteta tan kazu foun 4 no mós iha Munsípiu Aileu deteta ona kazu pozitivu 1, kazu pozitivu sira ne’e halo viajen husi Dili.
Portavoz mós relata, médiku ida ne’ebé durante halo atendementu ba mate-bian (Armindo Borjes) ne’ebe nia familia sira temi iha video ida ne’ebé viral (Dr Joni), ohin teste PCR pozitivu, no rezultadu hatudu katak médiku ne’e mós kontajiadu COVID-19.
Alende ne’e mós koordenador ne’e informa, ohin iha tan kazu detetadu ho kategoria moderadu baixa iha izolamentu Vera Cruz. Kazu ida ne’e detetadu pozitivu iha HNVG, mai ho isin-rua no keixa katak loron 3 ona bebé la bo’ok-an. Diagnóstiku traballu Covid-19 plus IUFD (Intra Uterine Fetal Death).
Nia relata, kazu grave ne’ebé iha Vera Cruz, desde horiseik uza ventilador no aimoruk balun tuir protokolu ne’ebé Timor-Leste adopta no ohin saturasaun oksijénio porsentu 96 no estável.
Jornalista : Sandi Belo
Asisten Editór : Pedro de Almeida
