Lafaek News—Ministra Saúde (MS), Odete Maria Freitas Belo, afirma, kurentena iha munisípiu balun laiha fasilidade kama atu fasillita pasiente sira hodi toba, nia husu arpintaria halo kama barak atu nune’e governu bele sosa hodi fornese ba fatin kuarentena.
“Karpintaria sira matenek estuda situasaun ida agora ne’e karik di’ak, tanba agora ne’e ita presija kama, ita la’os presija armariu, maibé ita hare’e karpitaria sira halo armariu mak barak,” dehan Ministra Saúde Odete Maria Freitas Belo ba jornalista sira, iha rezidensia PM Taur Matan Ruak, Farol, tersa, (11/05/2021).
Ministra rekomenda, karpintaria sira halo kama la presiza ho Ai-teka, maibé uza de’it triplek importante ema toba iha leten di’ak no labele monu, tanba ho situasaun ne’e atu sosa husi rai liur presija tempu ne’ebé naruk.
“Karpintaria sira lalika halo kama Ai-teka, halo de’it kama ne’ebé baibain ho triplek, oinsá mak ema toba atu labele monu, tanba iha ita nia rai laran rasik stock ba kama la iha, ita tenki sosa husi rai liur, tanba sosa husi rai liur presija mós tempu atu sasan ne’e bele to’o mai iha ita nia fatin,” nia rekomenda.
Jornalista : Sandi Belo
Asisten Editór : Pedro de Almeida
