Lafaek News—João Kefin (12), hosi Suku Tasae, Postu Administrativu Oesilo, rejiaun RAEOA, sente moris iha mundu ne’e la fasil hanesan liman fila ba mai, tanba ne’e deside aan ajuda inan aman liuhosi fa’an sasán.
João Kefin, hanesan mós labarik seluk ne’ebé mai hosi Oekusi, no hanesan mós labarik hosi munisípiu seluk ne’ebé hatene katak moris ne’e la fasil kuandu tu’ur de’it iha uma hodi hein de’it.
Ho ne’on nurak maibé tanba domin bo’ot, hakarak hakaman inan aman nia terus, obrigadu João Kefin tenki tula ninia sasán lori ba fa’an nune’e bele hetan netik osan ajuda inan ho aman.
João Kefin, oan hosi relasaun domin Markus Elo no ninia kaben Natalia Keluh, sorti bo’ot tebes hetan oan ne’ebé idade nurak maibé sente iha responsabilidade ba inan aman nia moris, deside aan ba fa’an sasán hodi sakrifíka ninia tempu osan me’an buka futuru ou eskola hodi sustenta nesesidade uma laran.
João Kefin, hahú konta ninia viazen moris, primeiru mai iha Dili tanba kondisaun ekonómia uma laran mak ezije, tanba hare ba inan aman ne’ebé idade ona, hanesan oan mane sente iha responsabilidade mezmu ho idade ne’ebé ki’ik komesa aprende ona buka osan.
Nia dehan, foufoun fa’an uluk manutolun da’an maibé tanba maluk barak mós fa’an hotu manu tolun entaun deside fa’an sasán seluk hodi labele hanesan tan ho sira seluk.
“Foufoun ha’u fa’an uluk manutolun maibé kolega barak mós fa’an hanesan, entaun ha’u deside fa’an fali sabaraka ho sigaru nune’e labele hanesan sira seluk nian,” Kefin konta ba LafaekNews iha jardín 12 Novembru Motaél-Dili, segunda (07/12).
Nia argumenta, sasán ne’ebé fa’an dala ruma iha sorti di’ak loron ida de’it hotu kedas maibé dala ruma loron ida ema sosa de’it uitoan, maski nune’e la habaruk hodi kontinua buka nafatin moris ba loron aban.
“Ha’u nia sabaraka ho sigaru ne’ebé tau iha bisikleta ne’e, dala ruma dader to’o lorokraik ema sosa hotu kedas, maibé dala ruma la hotu entaun kontinua fa’an fali ba loron aban,” konta Kefin
Antes termina dada lia ho LafaekNews João Kefin adianta, tuir loloos hafoin akaba nia estudu iha eskola primária atu kontinua ba pre sekundáriu maibé tanba kbi’it ekonomia la to’o, entaun deside buka osan iha kapitál nasaun hanesan mós sai modal ida nune’e tinan oin bele kontinua fali eskola hanesan ho ema seluk.
“Ha’u tamat SD (eskola primária) iha Baitnove klase 6, hanoin atu lanjut ba SMP (pre-sekundáriu) maibé susar tebes, tanba apa ho ama forsa la to’o. Ne’ebé ha’u deside mai Dili hodi buka osan atu bele ajuda fali ha’u nia família sira,” nia hakotu
Jornalista : Etelvina Sarmento
Editór : Ezequias Tomás
