Lafaek News—Monitorizasaun husi Civil Society Education Partnership (CSEP), konsege identifika problema iha Timor Leste sériu liu iha setór edukasaun komesa husi eskola primaria too sekundáriu.
“CSEP halo monitorizasaun no mòs peskiza ba dezenvolvimentu setór Edukasaun iha Timor-Leste haree problemas no susesu ne’ebè Ita nia setór edukasaun infrenta, tan ne’e mak CSEP idetifika liu husi peskiza sira ne’e, ita identifika katak eskola no dezenvolvimentu setór Edukasaun iha Timor-Leste presiza ita nia nai ulun sira atu bele Investe iha setòr edukasaun ho orsamentu estadu ida ne’ebè sufisiente husi porsentu 20-25,”Koordenadór Nasionál Sosiedade sivil, Josè de Jesus ba Jornalista sira iha Salaun FONGTIL Kaikoli Tersa 24/11/2020, hafoin remata aprezentasaun.
Nia hatutan, tinan 2021 governu iha planu bele Investe iha setòr edukasaun ho porsentu 10, sosiedade sívil Konsidera la sufisiente atu bele rezolve problema kompleksu ne’ebè edukasaun hasoru liu-liu iha nivel aldeia ho Suku sira.
“Ita triste bainhira haree ita nia eskola ita nia alunus, professor iha aldeia no suku sira ne’e difisil tebes asesu ba dezenvolvimentu setòr Edukasaun ida ne’ebè kompletu ho fasilsidade kadeira, meza, saneamentu no professores sira la sufisiente fasilita no hanorin prosesu aprendizajen iha eskola sira,” Esplika Nia.
Durante ne’e halo monitorizasaun ba eskola sira iha Ermera, Bobonaro, Ainaro, Aileu, Baukau no mòs Dili, foka liu ba iha eskola Primària, pre-sekundària no sekundàriu públiku no privadu.
Husi deskobrimentu hirak ne’e mak CSEP Hanesan sosiedade sivil rekomenda ba Parlamentu Nasionál, Governu atu bele sériu hodi Investe iha setòr edukasaun ho orsamentu ida sufisiente, hodi responde emediatamente ba problema edukasaun ne’ebè kompleksu iha Timor-Leste.
Jornalista : João da Costa Soares
Editora : Nelya Barros
