Lafaek News—Movimentu Kompionezes Timor Leste (MOKATIL), segunda (29/08/2022), realiza formasaun ho tópiku Agro-ekolójika ho durasaun semana 1 juventude husi munisípiu 13 inklui RAEOA iha munisípiu Aileu
Treinamentu iha sentru formasaun Francisco Xavier do Amaral iha Munisípiu Aileu ho tópiku Agro-Ekolójika ho sub-tópiku lubun ida mak envolve iha Topiku Ekolojia nia laran, hanesan atividade movimentu MOKATIL rasik, no atividade juventude nia Involvimentu iha movimentu nia laran oinsá ba future sira mak kontinua iha organizasaun ne’e, depois bele transmite fali ba iha fatin sira ne’ebé sira hela ba, ida ne’e mak nia objetivu,”Komite Sentral MOKATIL, Arsenio Pereira ba jornalista sira iha sentru formasaun Francisco Xavier do Amaral Aileu, segunda semana ne’e.
Eis Sekretariu Estadu Kooperativa ne’e argumenta, movimentu MOKATIL nunka para no sei kontinua la’o ba oin hodi fasilita formasaun ba juventude sira ne’ebé moris nu’udar toos nain atu bele servisu maka’a dezenvolve setor agrikultura atu bele suporta ekonomia uma-laran.
Formasaun sira ne’e oi-oin de’it ne’ebé nia tema agro-ekolójika, tamba MOKATIL nia baze lolos ne’e mak ba toos nain sira, iha treinamentu ne’e iha loron 3 iha teoria no loron tolu prátika, oinsá prátika halo toos iha uma hun, natar, hakiak ho ikan, atu hanoris sira bele utiliza rai ho másimu.
Ita ko’alia kona-ba toos nain, sai baze ida ba ekonomia rai laran, ekonomia uma kain, agora saida mak ita bele halo, liu husi produsaun, produsaun mos iha oi-oin de’it ne’e mai husi komunidade agríkola nian ne’ebé produs husi produtu saida mak ita iha, husi ne’e mak bele transforma moris ema hotu nian, tema ida ne’ebé iha hanesan Agro-Ekolojia agora ita nia konesimentu kona-ba agro-ekolójika ne’e saida, ko’alia kona-ba rai, be’e, fini, material sira ne’ebé ita halo produsaun ne’ebé labele estraga fali ba ekolójika ne’e rasik, ida ne’e mak esensial lolos husi ekolójika, maibé aprende hamutuk no matenek ne’ebé iha fahe ba malu,’’fundador MOKATIL ne’e esklarese.
Tuir eis SEKOP ne’e dehan, estrutura MOKATIL estabelese ona iha teritóriu Timor ho nia komite baze maioria juverntude kompostu feto-mane husi munisipiu 13 inklui RAEOA, ema nain 8 reprezenta kada sira nia munisípiu 13 ho RAEOA hodi partisipa iha formasaun refere.
Bai-bain kuandu tuir formasaun ou treinamentu iha termus normal ne’e ema sira partisipante mai aprende mais iha mekanizmu iha MOKATIL ne’ebé bai-bain ami adopta, sira mai aprende hamutuk katak oinsá ita bele deskute hamutuk, partisipante sira nia ideia oinsá, orsida ita ko’alia nia prátika oinsá, situasaun hirak hanesan ne’e mak durante ne’e akontese iha MOKATIL nia laran, la’os hanesan universidade sira hanesan dosente ho estudante, ita hot-hotu mai aprende hamutuk, partisipante sira nia ideia hotu ami tau hamutuk no saida mak ita hetan husi ideia sira ne’e,’’Arsenio hakotu.
Jornalista : Leandrino Soares
Editor : Agapito de Deus
