Lafaek News—Ministru Koordenadór Asuntu Ekonómiku (MKAE), Joaquim dos Santos Amaral, afirma, produtu bee GOTA kualidade di’ak liu bee importasaun tan ne’e governu sei servisu hamutuk ho kompañia GOTA hodi kontinua investe ba produsaun iha rai laran atu hamenus bee importasaun.
“Ami haree prosesamentu sira ne’e hotu priense rekizitu ne’ebé tuir padraun no lei mós permite, ita bele dehan ohin ha’u haree teste sira ne’ebé iha kona-ba prosesamentu materiál kimíka ne’ebé kontein iha bee nia laran, hatudu duni priense kualidade,” katak MKAE Joaquim hafoin vizita iha sentru prosesamentu bee GOTA iha Fathuda, sesta (12/02/21).
Governante ne’e reafirma, governu ho organizasaun mundial saúde mós la dúvida ho produtu bee GOTA tanba priense hela rekezitus ho realidade hatudu kualidade liu bee importasaun.
Governante ne’e hatutan, produtu bee GOTA ne’e hanesan produtu nasionál ida ne’ebé la lakon ho produtu be’e importadu, tann e’e governu sei apoiu fó kondisaun ba kompañia nasionál hanesan GOTA no indústria nasionál sira hodi hetan fatin.
“Nune’e gradualmente produtu nasionál hetan Fatin ne’ebé maka adekuadu hodi bele investe nune’e bele hamenus be’e ne’ebé importadu husi rai li’ur,” katak nia.
Ho ida ne’e, tinan ne’e governu planea liu husi rekuperasaun ekonómiku maka parseiru bo’ot ho setór privadu sira, tanba ne’e emprezáriu nasionál sira nia atividade ne’ebé la’o ho di’ak hodi investe ba rai rai laran.
“Ami ho diretor sira no ajentes, tradeinvest, SERVE, AIFAESA, no sira seluk, atu hatudu governu ninia apoiu atu bele servisu besik liu ho setór privadu, tanne’e maka ohin ami mai vizita kompañia GOTA ho prezidente kompañia ne’ebé máka esplika di’ak teb-tebes,” tenik Joaquim dos Santos.
Jornalista : Aniceto Dias
Asiténsia Editór : Egidio Nono
