Lafaek News-(Kovalima)-Motorista OJEK munisípiu Kovalima lamentavel perante presu mina sa’e, afeta ba motorist sira ne’ebé tula pasajeiru movimentu ba mai iha capital Kovalima.
Motorista (OJEK), Tomajio de Jesus, hateten kampu servisu ohin loron depende ba inan-sarani ho aman sarani iha laran mak bele hetan servisu, tan ne’e buka moris ho mekanizmu OJEK, maibé rendimentu loron ida hetan de’it dolar 2.00, polítika governu la lori povu kiik sai husi moris risku ekonomia.
“Kada ves loron ida ami hetan $ 2.00 lae $ 3.00, ita servisu hanesan ojek atu to’o lokraik mos labele, tanba ita halai mos hare ba mina hotu dader ba ojek ita ense tia mina agua bo’ot ida folin $ 2.50, ita senti loron ida tau mina $ 5.00 ne’e halai ba mina nian de’it,” Tomajio esplika
Nia dehan tula passajeiru ho distánsia husi Ladi mai iha merkadu Debos selu sentavus 50 de’it, no husi kamanasa ba Suai-Loro mai debos mak selu $ 1.00, maibe ne’e dalaruma loron ida nia hetan de’it ema na’in ida ou rua husi dader too lokraik.
“Rendimentu loro loron, osan ne’e la to’o ba ami atu sustenta ami nia familia loro loron ,tanba kada ves ita hola deit modo kalan nian mos los onan, osan ne’e atu rai nian sa laiha, sa tan ami nia oan sira eskola ne ami araska” tenik nia
Tomajio espresa nia sentimentu tristi tanba durante ne’e buka osan husi halo aktividade ojek maibe gasta barak liu hodi sosa Konbustibel, tanba dadaun ne’e folin bensin sa’e maka’as.
Jornalista : Moises Maideira (RCCT)
Editor : Chamot Nahac
