Lafaek News—Defisiénsia matan, João Barreto (JB) idade 51, husi suku Molop postu Bobonaro, munisípiu Bobonaru, durante ne’e hala’o nia estudu iha Universidade Nasionál Timor-Lorosa’e, Departamentu Inkluzaun Sosial, Fakuldade Siensias Sosiais, ba dahuluk finaliza obra siéntífiku ho Titiulu “Promové Talentu Ema ho Difísiénsia Matan Liuhusi Programa Artezenatu iha AHDMTL atu hetan Grau Baixarelata iha UNTL.
“Durante ha’u hala’o estudu iha inkluzaun UNTL ha’u senti haksolok tebes, tanba Universidade UNTL loke odamatan luan ba ema ho difísiensia, entaun ha’u iha vontade atu estudu iha departamentu Inkluzaun Sosial, nune’e ha’u komesa tama iha UNTL iha tinan 2018, senti kontenti tebes maske ha’u ho difísiensia matan maibé ha’u bele kontinua estudu iha UNTL” Dehan João Barreto iha Kampus Kaikoli, loron kinta, 22 Setembru 2022.
Entretantu João Barreto hateten difikuldade barak mak nia hasoru durante hala’o nia estudu iha Universidade Nasional Timor Loro sa’e.
“Durante ha’u eskola iha ne’e difikuldade barak mak ha’u hasoru ida mak ha’u la’o mesak, dalaruma ha’u tun sala dalan, tanba la domina dalan no laharee, depois bainhira iha aula profesores sira hanorin ha’u uzá rekaman de’it, ha’u rona didi’ak depois mak ha’u too uma estuda fila fali materia, durante prosesu hakerek ha’u uzá komputadór Jos Talking no letra brayel hodi ajuda ha’u hakerek too remata”dehan João Bareto
Entretantu Diretóra Departamentu Inkluzaun Sosial Cecilia Pereira, hanesan mós examinadór primeiru estudante difísiensia matan João Bareto, haktuir senti orgullu
“Ami nia departamentu Inkluzaun Sosial pela primeira vez marka istoria foun tanba ema ho difísiensia matan bele remata nia ezame Minimonografia hodi hetan grau Baixarelata ami senti orgullu loos, foufoun iha prosesu orietasaun hakerek nia uza letra brayel, ba ami hatene katak João Bareto iha talentu no kapasidade hodi uzá letra braiel no nia konsege aprezenta ho di’ak. Hatutan Diretóra Departamentu Inkluzaun Sosial, iha knaar fatin Kampus Kaikoli.
Jornalista : Zita Menezes
Editor : Agapito de Deus
