Lafaek News—Negosiante ai-leba Miguel dos Santos, orijenalidade husi postu administrativu Likidoe, munisípiu Aileu, esforsu la’o haleu sidade Dili buka osan liu husi fa’an modo tahan hodi sustenta nesesidade uma laran no apoiu oan na’in hat nia eskola.
Miguel kaer metin prinsipiu fundamental ida katak aman fa’an ona modo, maibé aban bainrua oan sira labele kontinua fa’an modo, maibé fa’an modo atu halo mudansa ba sustentabilidade uma laran no prepara future di’ak ba oan na’in hat.
Ema ida ne’ebé ho idade 45, hela merkadu Taibessi, sosa moda husi negosiante seluk hodi fa’an tutan ho maneira la’o ain, tula aileba iha kba’as troka husi kba’as sorin ba sorin buka osan haleu sidade Dili, maski la’o ain belit ho tahu dodok no rai-rahun iha tempu manas no malirin, tanba iha prinsipiu ida tan katak servisu hanesan atan, maibé han hanesan ema liurai.
“Ha’u faan modo tahan ne’e tanba ha’u haree ha’u nia ekonomia uma laran la augenta, entaun ha’u tenke fa’an hodi hodi suporta netik ha’u nia ekonomia uma laran, no liu-liu hodi suporta ba ha’u nia oan na’in hat nia estudu, tan ne’e ha’u nuudar aman ha’u tenke halo negósiu kiik hanesan ne’e,” dehan Miguel dos Santos ba lafaek news , bainhira hasoru malu iha Bemori, kuarta (13/01/21).
Miguel nia oan haat kompostu husi mane ida no feto na’in tolu no entre sira nain haat ne’e eskola hotu iha ensinu pre-sekundária postu administrativu Likidoe, nia hakarak oan na’in hat tenke susesu iha loron ikus liu husi fa’an modo ne’e.
” Ha’u nia oan hamutuk nain hat iha feto tolu no mane ida, no sira nain haat nee eskola hotu, no sira nain hat daudauk tuur eskola ensinu pre-sekundaria Likidoe ,tan ne’e ha’u sai hanesan aileba, fa’an modo tahan hodi suporta ha’u nia oan nain haat ne’e nia estudu too nivel universitáriu,” haktuir negosiante aileba ne’e.
Osan ne’ebé hetan husi ema sosa modo maneja ho kuida liu husi meius rai hamutuk, balun uza ba sosa sasan uma laran no balun uza hodi sosa oan sira nia atributu eskola nian hanesan ropa, sapatu, kadernu no sasán seluk husi eskola nian.
Miguel konta nia esperiénsia leba modo ne’e katak loron ida nia kontente tanba ema sosa too dolar 20 resin, maibé iha loron ida dala ruma ema ladún sosa, maibé la lakon vontade, tanba konsikuénsia husi negósiu ne’e loron ida ema sosa barak maibé loron ruma ema la sosa, presiza liu pasiénsia tenke as.
“Iha triste no iha mos kontenti baihira ha’u leba modo tahan hodi fa’a , loron manas ha’u la’o haleu , baihira ha’u la’o mak senti kabaas moras ha’u deskansa tiha minutu lima hafoin la’o tan ,senti triste liu, maibé ha’u pasiénsia de’it ,tan deit ha’u nia oan nain haat ne’e nia estudu hakarak atu sai di’ak iha futuru oin mai,” Miguel hasai lai fuan ne’e ho oin midar
Iha entrevista ne’e, Miguel kontente tanba jornalista sira buka hatene rendimentu negosiante kiik sira ne’ebé la’o iiha sidade Dili kada loron oinsa, dada lia kuaze minute 30, hafoin Miguel foti modo tau kba’as no hatais nia señelus mutin talin kór modok no lulun kalsa ain too iha ain tuur okos hodi kontinua atividade buka moris ne’e iha sidade Dili.
Jornalista : Dominga Viana
Editora : Nelya Barros
