Lafaek News—Ministériu Interior (MI), afirma liu hosi evaluasaun ita bele identifika fukun ka failansu ne’e iha ne’ebé, nune’e tau ideia hamutuk hodi tinan oin servisu di’ak liután.
“Ita lori sira mai hamutuk iha ne’e, halo evaluasaun hodi konsolida ema idak-idak nia forsa, hodi reforsa malu iha tinan fískal 2021, ita presiza ema hotu bele ko’alia ba malu ba oin atu serbí ne’e oinsá,” Vise-MI, António Armindo, informa ba jornalista sira iha edifísiu MI Villa-Verde, Sesta (18/12).
Afirma nia, iha tinan oin ministériu sei foku liu ba parte seguransa, nune’e bele koloka ka aumenta membru polísia iha liña fronteira hodi asegura ita ninia soberania hodi fó seguru ba ema hotu iha nasaun ne’e.
Nia argumenta, servisu barak iha tinan ida ne’e la’o ladún di’ak ka paradu tanba impaktu hosi surtu COVID-19. Tanba ne’e nia promete, liuhosi esperiensia ka identifikasaun ba problema ne’ebé mosu tinan ida ne’e, tinan oin servisu hotu bele la’o di’ak fali tuir planu ne’ebé iha liuhosi sorumutu ida ne’e.
Entretantu iha sorumutu ohin kompostu hosi diresaun hotu ne’ebé tutela iha ministériu interior, protesaun sívil, PNTL no polísia imigrasaun.
Jornaliata: Orlando Magno
Editór : Ezequias Tomás
