Lafaek News–Movimentu Estudante Tane Oe-Cusse (METO) ejize governu atu fasilita estudante Atoni-oan ne’ebé ba tuir votasaun too agora seidauk fila mai Dili.
Lia hirak ne’e hato’o husi porta vos METO, Mateus Lopo ba jornalista sira liu husi komunikadu imprensa iha Jardin 5 de maio Kolmera Dili, segunda (26/04/22) atu husu governu fasilita lalais roo hodi tula hikas estudante sira mai Dili hodi tuir sira nia estudu.
Husu Primeiru Ministru Taur Matan Ruak atu buka dalan fasilita estudante no komunidade sira husi Atoni-oan mai fali Dili,” Lopo deklara.
Porta vóz METO afirma, Relasiona ho loron eleisaun prezidensiál periodu 2022-2027, polítika governu liu husi Ministériu Administrasaun Estatal (MAE) iha loron 14 fulan Abril tinan 2022, anúnsia ba eleitores sira husi munisipiu 12 prepara kamioneta 110 hodi transporta sira ba ezerse sira-nia direitu síviku iha munisipiu no iha loron 17-18 fulan Abril tinan 2022 kareta tula duni sira ba tuir votasaun iha ida-idak nia munisipiu maibė komuniade husi Rejiaun Administrativa Espesial Oe-cusse Ambenu (RAEOA) diskriminadu iha tratamentu husi politika governu, Tanba iha loron 17-18/04/2022 komunidade no estudante Oe-cusse oan kuaze 2000 buka alternativu rasik hodi ba partisipa loron eleisaun.
Atoni oan ezerse ona direitu síviku no termina ona rezultadu eleisaun ba prezidente da Repúblika periodu tinan 2022-2027 maibe komunidade no estudante Oe-cusse oan sei dilimátiku no halerik atu fila mai kapital Dili hodi kontinua servisu no estuda.
Laiha transporte maritima adekuadu bele transporta hikas estudante no komunidade mai Dili Roo-Ahi Berlin Ramelau hetan ona estragu iha loron 17/04/2022 iha portu Kitahara, Mahata Oe-cusse, agora laiha nesesidade atu halo movimentasaun, Barco Rapidu(Kapal Cepat) laiha kapasidade hodi transporta estudante no komunidade sira ho numeru boot iha tempu badak,” Nia Relata.
Nia esplika, Barco Rápidu (Kapal Cepat) ho presu billete ne’ebé karun $15 ate $25 foo impaktu ba estudante sira atu labele viajén, Aviaun ZEESM ho presu billete $45 ami estudante no povu kbi’it laek labele asesu.
Husu ba Ministru Transporte no Telekomunikasaun(MTK) no Diresaun Nasional Transporte Maritíma atu controla presu billete Ró privadu sira-nian no mos MAE hodi servisu hamutuk ho MTK atu fasilita estudante no komunidade sira gratuitamente fila-fali mai kapital Dili hodi tuir prosesu aprendisajén,” Mateus afirma.
Entretantu tuir portavos nee katak, bainhira govrrnu la tau ba kestaun ka abandona nafatin estudante sira mak, METO sei halo petisaun ba parlamentu no mos sei halo demostrasaun iha edifisiu ministeriu relebante nia oin.
Jornalista : Orlando Magno
Editor : Agapito de Deus
