Lafaek News-Ministru Ensinu Superior Síensia e Kultura (MESSK), Longuinhos dos Santos, hala’o enkontru hamutuk ho Primeiru Ministru (PM) Taur Matan Ruak ko’alia kona-ba Tomada de pose ba Reitór foun Universidade Nasionál Timor Leste (UNTL).
Tuir Ministru ensinu superior síensia e kultura katak, tomada de pose ba Reitór foun ne’e, kompeténsia husi Konsellu Jerál UNTL nian maka sei organiza prosesu toma de pose ba Reitór foun nian.
“Ha’u seidauk iha informasaun kona-ba data fiksu tomada de pose maibé tuir informasaun ne’ebé maka fo sai iha media husi konsellu jeral nian katak iha semana ohin atu iha tomada de pose, maibé data seidauk fiksu,” Dehan Ministru Longuinhos ba Jornalista sira, Kuarta (20/01/2021), iha palásiu Governu.
Nia haktuir, data fiksu ba estudante ano letivu 2020-2021 ne’e, sei iha prosesu semana ida nia laran, tanba ekipa koresaun ba ezame sei aprezenta mai iha komisaun asosiasaun ensinu superior nian, depois maka kontinua aprezenta ba iha MSSK atu bele delibera, nune’e bele públika sai.
Esperansa ba iha Reitor foun ne’ebé maka dadaun iha katak ninia komitmentu ba programa ne’ebé maka iha liu-liu liña kordenasaun ho MSSK tenke iha komitmentu ida ne’ebé maka di’ak.
Tan ne’e, Reitór foun mós iha komitmentu katak, nia tenke hapar ho polítiku governu nian ne’ebé maka objetivu ida de’it atu garantia kualidade ensinu superior nian.
Nune’e mós tuir moto husi UNTL nian katak, sentru excelente garante ba ensinu superior nian liu-liu ba prosesu tomak ne’ebé maka iha UNTL.
Estajiada : Joselina dos Santos
Editór : Floriano Soares
