Lafaek News— Oitavu governu lideradu Primeiru Ministru (PM) Taur Matan Ruak, deside ona liuhosi reuniaun konsellu ministru propoin Presidente Republika (PR) Francisco Guterres Lú Olo atu renovasaun estadu emerjénsia ba loron 30 hodi pervene pandemia covid-19.
Ministru Presidénsia Konsellu Ministru (MPKM), Fidelis Manuel Leite Magalhães, afirma governu delibera atu propoin ba Prezidente Repúblika, Francisco Guterres Lú Olo, renovasaun estadu emerjénsia, ba loron tolu nulu.
“Ohin konsellu ministru deside, governu husu dala ida tan atu estensaun estadu emerjénsia ba fulan fevereiru no abril, ne’ebé sei hato’o ba presidenti republika no tuir dalan ne’ebé konstituisaun fó, ne’ebé maka inklui konsellu estadu no seguransa, depois haruka fali ba parlamentu hodi halo aprovasaun, depois maka governu passa fali ba medidas inplementasaun ba estadu emerjénsia,” dehan MPKM Fidelis Manuel Leite Magalhães, ba jornalista sira hafoin partisipa reuniaun KM iha palasio governu, kuarta, (20/01).
Ministru fundamenta, haree ba mudansa preokupante husi situasaun epidemiolojika no proliferasaun ba kazu rejistadu sira husi kontájiu Covid-19 nian, iha nivel rejionál, no mos iha nivel mundial, atu evita no neutraliza risku sira husi propagasaun SARS-CoV-2.
“Atu bele proteje saúde públika no iha kbiit atu hatan ba sistema nasionál saúde nian, governu propoin ba Prezidente Repúblika katak, ho renovasaun estadu emerjénsia, permite atu suspende ka limita direitu kona-ba sirkulasaun internasionál, husi sirkulasaun no fiksasaun rezidénsia no rezisténsia nian,” dehan Fidelis.
Tan ne’e atu restinje ema nia direitu fundamental sira hodi kontribui ba iha medidas distansiamentu sosiál prevensaun ba Covid-19 lei de’it la to’o tenke iha medidas ne’ebé bele halo liu husi deklarasaun estadu emerjénsia.
“Motivu ida di’ak liu iha nasaun tomak ne’ebé opsaun ida ne’e di’ak liu, tanba governu hatene katak ida ne’e maka di’ak liu ba sidadaun no mós ba enrikesimentu ou meloramentu ba medidas hirak ne’ebé governu foti fulan-fulan ida ne’e ita hotu konkorda no lapresija diskute ona kona-ba lei ka EE, ba situasaun ida agora ne’e presiza duni medidas Estadu Emerjénsia,” nia hakotu.
Jornalista : Pedro de Almeida
Editora : Nelya Barros