Lafaek News –Ministru Edukasaun Juventude no Desportu (MEJD), Armindo Maia, nia parte simu informsaun hosi Munisípiu Vikeke liga ho asaun estudante feto ida ne’ebé fó orientaun ba estudante foun ne’e konsidera krime.
“Iha diploma ministerial konjuntu ne’e ita fo orientasaun ona kona-ba pratika orientasaun sira iha eskola, buat ida violensia ne’e iha Vikeke ami simu informasaun no ami nia ekipa tun kedas ba iha ne’eba hodi halo investiga kedas, la’os iha vikeke deít maibé iha eskola balun ne’ebé iha informasaun hanesan investiga hotu,”dehan Ministru Edukasaun Juventude no Desportu (MEJD), Armindo Maia, hafoin partisipa reuniaun konsellu ministru iha palasiu governu, (20/01/2021).
Governante ne’e akresenta, ekipa husi MEJD hala’o investigasaun bainhira relatróiu prontu ona foti medidas kona-ba aktus estudante nian ne’ebé akontese hanesan iha vikeke.
“Prontu ekipa investiga hein relatoriu husi ne’eba depois foti medidas, iha Vikeke sira haruka surat mai dehan resolve ona entre inan-aman no eskola, maibé ita konsidera ne’e krimi, entaun tenke lori ba oin, tuir lolos labele akontese maibé ita haruka orientasaun sirkular balun dehan la simu ho buat sira ne’e hotu, tuir lolos laiha programa orientasaun,” nia hakotu.
Jornalista : Pedro de Almeida
Editora : Nelya Barros
