Lafaek News–Komandu Polísia Nasional Timor-Leste (PNTL), munisipiu Dili Dirije formatura hodi fo orientasaun ba membru polísia sira atu halo servisu seguransa másimu iha sentru votasaun iha Dili Laran.
Lia hiran ne’e hato’o husi Komandante Komandu PNTL munisípiu Dili,Superintendente Xefe Polísia, Henrique da Costa liu husi ninia intervensaun iha Komandu PNTL munisipiu Dili, Domingu 17/04/2022.
Iha terrenu imi tenke atensaun, kuandu ema ruma halo provokasaun ba instabilidade tenke foti medidas halo prevensaun maibe respeitu nafatin direitus humanus, karik imi nia kbi’it la to’o atu atende, relata urjente mai Delta Base ka komandante esquadra sira hodi responde ho lais buka solusaun.”, Superintendentw Xefe Henrique Rekomenda.
Henrique hateten, Komandante Jeral PNTL dirije formatura jeral iha Kuartel Jeral PNTL atu komandu Dili kontinua formatura atu halo preparasaun no fo orientasaun ba membros sira atu ezekuta servisu ho diak iha terenu, membru hotu tau responsabilidade másimu hodi akompañia material sensitivu husi STAE ba sentru votasaun ho seguru.
Husu ba membru sira asegura material sensitivu to’o dader hodi kontinua ba eleisaun, depois eleisaun remata sei akompanha material sira ne’e fila mai STAE Dili, imi hatene sentidu hosi SINTUPE! Ne’e katak isin lolon mak PNTL Munisipiu Dili, ain sanak sira ne’e mak hanesan Esquadra 6, Seksaun 6 no Unidade kuartelada sira ne’ebe apoio ita. Kuandu ain sanak balun kanek, sintupe ne’e labele lao. Entaun mai ita apoio malu atu PNTL Dili hodi garante eleisaun ne’e susesu ita hotu nian, ba PNTL hotu no-mos ba Timor-Leste”, nia hakotu.
Seremonia deslokasaun ne’e Komandu PNTL Dili hetan apoiu efetivus hosi Eskuadra 6 hamutuk ho Unidade Kuartelada tolu (3) UEP, UPM no UPF hodi apoiu Komandu Munisípiu fó seguransa ba eleisaun prezidensiál iha loron 19 abril 2022 la’o ho hakmatek no seguru.
Jornalista :Orlando Magno
Editor : Agapito de Deus
