Lafaek News–Membru oitavu (Vlll) governu Konstituisionál, ohin kuarta (05/01) hahú simu ona vasina doze datolu Pfizer Booster nu’udar vasina adisionál ida hodi haforsa liu tan hirak ne’ebé kompleta ona vasina daruak.
Ministru Prezidénsia no Konsellu Ministru (MPKM), Fidelis Manuel Leite Magalhães, hateten ohin hafoin reuniaun Konsellu Ministru, membru governu sira hotu simu Booster hodi halo forsa liután vasina hirak ne’ebé mak simu tiha ona dalaruak.
“Ne’e akontese iha mundu tomak i ne’e rekomendasaun saúde nian, liu-liu wainhira ita hotu hasoru ida ne’ebé mai husi mutasaun virus ne’e nian liu-liu ho omicron, tanba ne’e importante tebes atu sidadaun hotu ba buka vasina, no husi saúde sei fó vasina iha sentru vasisaun sira para ita boot sira bele haforsa liu tan vasina ne’ebé mak simu tiha ona, karik mihis liu ona halo mahar fila fali, halo todan fila fali, haforsa fila fali hodi bele aguenta ameasa saida de’it mak sei mai husi virus ne’e,” dehan MPKM Fidelis Magalhães hafoin remata enkontru KM iha Palasio Governu Dili, kuarta (05/01/22).
Governante ne’e akresenta, bainhira simu ona vasina, virus mós la tuur hakmatek, virus mós halo mutuasaun, mutuasaun ho objetivu atu muda nia an hodi oho ema.
“Tanba Ne’e mak ameasa ne’e global i moras ne’e ba mai iha fatin-fatin, agora ita Timor Leste ita iha Pfizer ne’ebé mak disponivél mai ita atu uza hodi sai Bostter hodi halo forsa liutan defeza imuni ita nian, maka governu husu ba sidadaun hotu-hotu, sira ne’ebé mak vulneravél, sira ne’ebé servisu iha liña frente atu hotu-hotu ba buka vasina, hodi ita hotu sobrevive la presiza mate i kontinuasaun normaliza ita nia vida ne’e ba oin,” hakotu MPKM Fidelis Magalhães.
Jornalista : Juvita dos Santos
Editor : Agapito de Deus
