Lafaek News- Prezidente Repúblika Francisco Guterres Lú Olo informa, ba eleisaun prezidensiál tinan 2022, númeru sentru votasaun no estasaun votu sei aumenta hamutuk 1200 iha territóriu Timor-Leste.
Ba eleisaun prezidensiál tinan ne’e, númeru sentru votasaun no estasaun votu sei aumenta iha territóriu Timor-Leste tomak. Ba eleisaun antesipada 2018, iha sentru votasaun 885. Ba eleisaun prezidensiál 2022, sentru votasaun sei aumenta ba 1200, númeru estasaun votu sei aumenta husi 1260 (iha 2018) ba 1500, iha tinan 2022″, hatete xefi estadu Francisco Guterres lu_olo liu husi komunikandu imprensa media PR kuarta 05/01/2022.
Lú Olo hatutan, hasa’e númeru sentru votasaun no estasaun votu permite hakbesik liután fatin votasaun ba eleitór sira no nune’e, maioria ho otas 17 ka liu, ne’ebé rejista iha STAE, bele ezerse sira-nia direitu atu hili Prezidente Repúblika ba mandatu 2022-2027,nune’e, taxa partisipasaun eleitór sei sa’e iha eleisaun tuir mai.
Ho númeru sentru no estasaun barak liu, númeru votante iha fatin ida-idak sei menus, tanba buka hamenus númeru eleitór halibur iha fatin ida, governu TL foti medida di’ak ida atu proteje mós ita nia ema husi vírus moras Covid-19 nian, ne’ebé sei la’o nafatin iha mundu, ho variante oioin”, hakotu PR liu husi komunikandu imprensa.
Jornalista : Rita moniz
Editor :Agapito de Deus
