Lafaek News—Negosiante Miranda Soares Maya, afirma maski loron tomak habai de’it aan iha loron matan nia okos hodi fa’an sasán, maibé sente kontente tanba bele lori oan domin na’in rua tu’ur iha banku sekundáriu no universitáriu.
Vendedora Miranda Soares Maya, maski moris ho kondisaun buat hotu limitadu, maibé la habaruk nia hodi buka osan sustenta oan sira nia moris liuliu realiza mehi oan sira nian hodi bele kontinua estudu hanesan mós ho ema seluk.
Maski natureza ho kondisaun atmosfera ne’ebé manas, ba nia sente kaman no sente bain-bain, maski isin kulit komesa maran tanba loron nia manas.
Tuir mai Miranda dada lia uitoan ho LafaekNews hodi haktuir esforsu hanesan fa’an sasán ne’ebé hodi sustenta oan domin na’in rua ninia estudu.
“Foufoun ne’e ha’u fa’an uluk modo maibé momentu ne’ebá modo la folin, entaun deside fa’an fali sasán seluk hanesan Supermie, Pop Mie, agua, dosi no sasán seluk tan,” Miranda informa ba LafaekNews foin lalais ne’e iha jardín 12 Novembru.
Hatutan nia, liuhosi fa’an sasán sira ne’e mak balun uza ba nesesidade uma laran no seluk mak uza hodi responde oan sira nia nesesidade liuliu kona-ba estudu ninian.
“Ha’u iha oan na’in rua, kompostu hosi feto ida no mane ida. Daudaun ne’e ida mane hala’o estudu iha UNTL no feto eskola iha STM (ESTV) Bekora,” dehan nia
Haktuir nia, mezmu hanesan negosiante loron-loron fa’an sasán, sempre iha vantazen no dezvantazen, maibé hakarak ka lakohi tenki obriga aan ba fa’an, tanba la iha tan dalan seluk hodi bele sustenta uma laran no liuliu hare oan sira nia presiza.
“Dala ruma fa’an ema sosa, dala ruma la’e. Situasaun hanesan ne’e halo triste más nafatin fa’an, maski dala ruma loron ida la han, maibé tanba hanoin hodi muda oan sira nia moris hakarak ka lakohi obrigadu tenki fa’an,” nia triste hodi subliña
Nia dehan tan, maibé tanba kle’ur ona fa’an dezde 2012, mezmu dala ruma loron tomak ema la sosa maibé la sente baruk maski ida ne’e bele halo hanoin ne’e todan ou triste.
Kontribuitór : Domingas Viana
Editór : Ezequias Tomás
