Lafaek News—Negosiante Ai Leba ho inísial GCS hosi suku Dare, postu administrativu Vera Cruz, munisípiu Dili, sente moris kontinua sai todan tan, tanba bainhira hala’o ninia atividade hanesan baibain hodi fa’an sasán hetan soke hosi suspeitu ho inísial CB iha área Farol.
Dadeer rai hu’u mutin hader hosi toba kalan, sai esperansa ba negosiante ambulante iha loron foun ne’e bele hetan netik osan ruma, hodi hamarik leba nia sasán tu’un ba sidade hodi fa’an sasán (Ai farina), nune’e bele reforsa nafatin moris iha kondisaun moris ne’ebé mak nakonu ho simplisidade no limitadu nia laran.
Tuir mai vítima GCS konta ba LafaekNews ohin (16/12), iha komandu munisípiu Dili, dadeer sai hosi uma la iha sinál aat ruma mak sente katak ohin loron bele hetan dezastre hanesan ne’e.
“Ha’u hosi dadeer mai fa’an ai-farina tahan iha Dili laran, to’o iha área Fárol nian, labarik ne’e halai motor ho velosidade makas mak soke ha’u iha parte ain, halo ha’u monu kedas iha fatin,” konta vítima.
Alende ne’e iha sorin seluk suspeitu ho inísial CB (15) rekoñese nia soke duni vítima tanba sente ta’uk bainhira hetan polísia hala’o hela patrulla.
“Ha’u ho motor halai neineik la uza kapaseti, mak polísia sira hakilar ha’u entaun ha’u trauma halai makas mak soke tiu ne’e,” deklara nia
Entretantu hafoin akontesimentu ne’e parte Polísia Nasionál Timor Lorosa’e halo kedas intervensaun hodi lori vítima ba halo tratamentu iha ospitál, no kaptura kedas suspeitu hamutuk motor ho marka Yamaha Vega númeru polísia ka plat I.8410 lori kedas ba komandu Dili nune’e bele loke prosesu investigasaun.
Jornalista : Orlando Magno
Editór : Ezequias Tomás
