Lafaek News—Francisco José de Almeida, promete sei implementa matenek ne’ebé hetan iha Universidade Oriental Timor Loro sa’e (UNITAL), ba iha sosiedade atu transforma joven sira nia konesimentu hodi kontribui ba prosesu dezenvolvimentu nasionál.
“Ami departamentu komunikasaun sosiál UNITAL, ami nia moto rasik, katak “ba halo servisu, la’ós ba buka servisu,” signifika buat ne’ebé ami aprende iha universidade másimu ona atu implementa,” Francisco ba Lafaek News iha kampus UNITÁL Bekora, kuarta (16/12).
Hatutan nia hodi reforsa, hanesan kandidatura finalista iha departamentu komunikasaun sosiál sente kontente no sei lori matenek ne’ebé iha ba moris liuliu iha vida hanesan membru komunikasaun sosiál.
“Ha’u sente kontenti tebes, tanba bele loke tan espasu ida ba ami atu la’o ba oin. La’ós to’o iha ne’e de’it, ami sei kontinua (implementa) ami nia matenek ou síensia ne’ebé aprende durante tinan 4. Ami sei nakloke ba ema hotu no sei lori matenek hodi kompete iha rai doben Timor Lorosa’e,” nia subliña
Entretantu iha fatin hanesan, Dekana Fakuldade Síensia Sosiais no Polítika, Felecidade Xavier, hatete Universidade Orientál Timor Lorosa’e (UNITAL), no liuliu fakuldade refere iha departamentu tolu mak ohin loron hala’o yudisium, no sei hala’o graduasaun iha fulan ne’e nia laran.
“Tinan ida ne’e yudisium ba da-VIII, hamutuk na’in 33, ne’ebé kompostu hosi departamentu Komunikasaun sosiál, administrasaun públika no relasaun internasionál, no plano ba graduasaun ne’e tuir despaxu hosi reitór sei hala’o iha loron 28 dezembru tinan ida ne’e,” dehan nia
Jornalista : Sandi Belo
Editór : Ezequias Tomás
