Lafaek News—La tauk no hakribi, la sente mo’e atu sukit lixu ne’ebé butuk hamutuk iha lixu fatin hodi hili kalen at, besik frozen, lata mamuk tuku belar enxe karon tetu kilu ida sentavus 10 hodi sustenta moris ba loron naruk.
Ana Rosa Ribeiro dos Santos, idade 78, hela iha Tasi-Tolu rai-hun bairru motor kross, laiha osan hodi sustenta moris, tan ne’e obriga la tauk no hakribi atu hakbesik ba lixu ne’ebé iis, falun inus hodi hili sasán ne’ebé iha valór ekonomia hanesan kalen aat, besi frozen, no lata mamuk tau hamutuk hodi tetu ho presu sentavus 25 atu responde nesesidade loro-loron.
Dadeer raihun mutin rai sei falun hela ho maha-wen, hadeer ona husi toba fatin uma Tasi-Tolu raihun, falun ona hena ba ulun hodi hakat ba lixu fatin ne’ebé butuk ho sasán oi-oin, kaer ai iha liman sukit lixu husi leten ba okos buka kalen at tau hamutuk, besi frozen tau ketak, lata mamuk halibur molok loron manas leba ba uma.
Situasaun reál iha lokál lixu Tasi-tolu estrada ninin sae ba estatua João Paulo II nian, la fasil ba ema ne’ebé despreza sasán dodok, tanba iis, maibé Avó Ana pasiénsia taka netik hena ona oin falun inus ho ibun atu labele horon iis ne’e hodi hili kalen.
Idade 78 la’o hakruuk da-daun, la tauk moras atu afeta ba saúde, badinas hili sasán ne’ebé sei iha valor ekonomia, dala ruma komunidade sira so’e iha lixu fatin, hili tutan hodi tuku belar hodi lori ba tetu hetan netik osan uituan atu bele sosa matabixu dadeer nian, no sosa foos atu han lor-loron.
“Dader ha’u mai hili hela kalen aat sira ne’e, loraik ha’u nia beioan sira mak lori ba tetu, selae hili hamutuk to’o karon rua ka tolu mak foin telfone sira ne’ebé atu tetu mai tetu iha uma” espresa avó Ana Rosa ba Jornalista Lafaek News iha fatin lixu estrada ibun dalan ba João Paulo II Tasi-tolu, tersa semana ne’e.
Maibé, Avó Ana Rosa Ribeiro dos Santos konta ba Lafaek News katak, dadeer nia mesak mak la’o hili kalen aat sira ne’e, tanba beioan sira ba hotu eskola, no rendimentu ne’ebé avó Ana hetan husi lixu mak bele ajuda nia oan sira sosa kafé masi-midar no dosi ba nia beioan sira han iha tempu dadeer.
Avó ne’e haktuir, presu lata mamuk kilu ida hetan sentavus sanulu, besi aat kilo ida hetan sentavus 25, no atu hetan osan barak depende ba badinas de’it, tanba folin ki’ik hela hanesan ne’e tenke hili halo barak kedas mak foin tetu nune’e bele hetan netik dollar $7 no $8.
“Ha’u hein de’it osan husi ha’u nia oan sira bainhira mak to’o mai, di’ak liu ita naran buka buka oituan-oituan hodi hola netik matabixu dader nian, no ba beioan sira eskola, neduni ita hela iha rai Dili ne’e tenke badinas buka osan, ita la badinas ita atu han saida, bee mós osan hahan mós osan no modo mós osan” espresa avó Ana Rosa ho lian halerik.
Avó feto Ana Rosa Ribeiro dos Santos iha oan mane nain 6 no feto nain 5, dadaun ne’e avó hela ho nia oan feto ida ho beioan husi oan sira ne’ebé hela hamutuk 11, avo nia oan mane sira servisu iha munisipiu hotu, servisu hanesan halo uma ho solda besi no oan feto sira forma uma kain, maibé hela dook husi nia.
“Ajuda ha’u nia beioan sira hola dader hola dosi no hola hahan iha uma laran, ita atu hein de’it nia aman sira bainhira mak atu simu lalais osan ne’e fo mai, paling simu karik sira fo $100 ka $200 ida hanesan ne’e” dehan avó Ana Rosa.
Nia inan feton ne’e haktuir katak, besik ona tinan 80, nia seidauksimu osan terseira idade, durante ne’e avó ho nia oan sira buka meius hodi trata dokumentus gasta osan kuaze $500 ona maibé dehan dokumentus la loos nafatin, entaun avó deside lakohi trata tan ona dokumentu ikus hili kalen too ohin loron.
Jornalista : Juvita dos Santos
Editora : Nelya Barros
