Lafaek News—Timor Leste rejista kazu pozitiva Covid-19 mane ida iha Kinta 28 Janeiru 2021, iha RAEOA Ambenu Oe-kusse.
Dadus ohin loron komulativu teste: 18.902, hein rezultadu: 176, Komulativu kazu: 69, Rekuperadu: 50, Kazu foun: 1, Atual baixa: 19, Rezultadu negativu: 18.667, Total karantina: 220 (Dili 128, munisípiu 102), Auto karantina: 192 (Dili 181, munisípiu 11), Pasa ona loron 14 iha karantina: 7497 (Dili 6182, munisípiu 1315).
Ita rejista tan kazu pozetivu foun ida (1) iha loron 28 janeiru 2021, sidadaun Timor oan, mane ho idade 15, laiha sintomas, signifika sidadaun ne’e laiha isin manas, mear no inus been, esplika dermatolojista kordenadóra jerál komisaun nasionál Covid-19, Odete da Silva Viegas, iha konferensia Imprensa, Palasiu das Sinzas Kaikoli, Sesta (29/01/2021)
Odete haktuir katak sidadaun ne’e hala’o viajen husi Timor ba iha Atambua iha loron 4 Janeiru, ba hela semana 2 iha Atambua, no fila husi Atambua iha loron 18 janeiru.
Sidadaun ne’e iha Wini loron 2, tama tuir fronteira Sakato hamutuk ho nia kolega na’in 7, no ekipa vijilánsia foti sidadaun ne’e ba iha fatin karantina ne’ebé dezignadu iha RAEOA, total ema ne’ebé karantina iha RAEOA hamutuk ema na’in 64, na’in 8 mak tama legal, no na’in 54 mak tama legal,” dehan nia.
Alende ne’e husu ba komunidade sira ne’ebé mak hela iha fronteira, nafatin kumpri medidas ne’ebé mak hatoo tiha ona, atu labele liu fronteira illegalmente.
“Tanba ikus-ikus ne’e sidadaun sira ho konsiénsia rasik hakat tuir fronteira tama sai, ida ne’e sei fo risku ba ita nia an rasik, ita nia familia no mós ita nia komunidade, hakarak Timor-leste livre husi moras Covid-19 ita hotu-hotu tenki kontribui,” Odete sujere.
Jornalista : Sandi Belo
Editora : Nelya Barros
