Kovalima-(Lafaek News)—Vise Ministru Saúde, Bonifacio Maucoli, afirma implementa vasina la’os obrigatóriu, maibé ba da-daun ministériu saúde prepara hela regulamentu uzu de vasina atu konsensializa komunidade sira antes implementa programa vasinasaun.
“Ko’alia kona ba Uzu de vasina, ita iha ona planu atu implementa uzu de vasina, maibé iha lei ne’e la obriga, maibé persija konsensializa, konsénsia ema ida-idak nian atu bele simu Vasina ida ne’e,” Vise MS, Bonifacio Maucoli dos Reis, hatoo liu husi intervensaun iha enkontru entre koordenasaun ho diretór servisu saúde ne’ebé destaka iha Fronteira, Kinta (28/01/21).
Governante ne’e fundamenta, Ministéri Saúde iha ona planu hamutuk ho OMS no UNICEF dezenvolve hela dokumentu lei nian ne’ebé sei aprezenta ba Konsellu Ministru hodi hetan aprovasaun hafoin bele implementa vasinasaun.
“Lori ba konsellu ministru tanba atu hodi haree efeitu sekundária sira, kona-ba akurasaun, kustu, tanba agora da-daun ita hetan mak doasaun porsentu 20, husi Governu Austrália, sira sei fo 24 miloens dollares Australia atu hodi sosa vasina, más governu mos tenke tau osan hodi sosa mós vasina atu ita bele implementa vasinasaun iha fulan Marsu ou Maiu tinan ne’e,” Bonifacio esplika.
Tuir nia, bainhira atu implementa programa vasinasaun ne’e sei involve mós autoridade lokál liu-liu pesoal saúde sira atu halo advokasia ho komunidade sira antes simu vasinasaun.
Jornalista : Tynho Gusmão/José Ferreira (RCCT)
Editór : Chamot Nahac
