LafaeK News—Makina bomba bee moos rua avaria iha merkadu Taibesi difikulta tebes negosiante sira tanba susar atu asesu ba fasiliade bee liliu ba konsumu no uza ba nesidade seluk.
Tuir negosiante merkado taibesi, Tereza Pereira, hateten problema bee moos sai difikulta tebes, tanba laiha bee atu uza hodi fase modo inklui ba haris fatin.
“Bee moos laiha ami atu fase de’it modo mós tenki sosa sergen rua hetan $0.25 centavos, entaun ida-ne’e sai problema mai ami wainhira fa’an sasan iha merkadu Taibesi ne’e,” dehan negosiante Tereza Pereira ba jornalista Lafaek News iha merkadu Taibesi, tersa-feira (10/08/2021).
Iha sorin seluk, Koordenadór jestor Merkadu Taibesi, António Manuel Cardoso, hateten, klaru katak iha merkadu tabesi bee moos la iha tanba makina ne’ebé atu fornese bee moos ne’e ba nesgosiante sira dadaun ne’e avaria, tan ne’e sira buka rasik bee hodi uza, makina ema tesi hotu fiu no labele la’o, entaun vendedores sira tenki sosa be’e moos hodi utiliza ba sira nia nesesidades loro-loron hanesan fase modo no halo kafe ou bele mós uza ba haris fatin.
Nia afirma, preokupoasaun ne’e jestor rasik hato’o ona ba parte kompetente maibé to’o agora laiha rezultadu.
“Makina bomba bee moos tolu ne’ebé uluk instala iha tinan 2016, maibé makina tolu ne’e uza de’it maka ida, rua aat hotu, ami hato’o kestaun ne’e ba leten maibé laiha resultado no governu la tau matan,” dehan jestor merkadu Taibesi.
Entretantu tuir observasaun jornalista lafaek news nota iha area merkadu Taibesi fasilidades hanesan haris fatin ba vendedores no kompradores sira nian taka metin ho kalen, tanba be’e laiha hodi utiliza inklui mós lampu mate lakan, maske nune’e vendores sira kontinua hala’o atvidade negosiu normal no kumpri mós regras prevensaun pandemia Covid-19.
Jornalista :Manuel Andrade
Asisten Editór :Pedro de Almeida
