Lafaek News—Relasiona udan boot iha loron (4/04/2020, rezulta mákina unidade 26 hetan estragus iha sidade, maibe tekniku sira konsege rekupera makina bomba bee moos ne’e 25 di’ak,  falta ida iha suku Kamea sei halo rekonstrusaun.

“Relasiona ho inundasaun iha loron 4-04-2021 ne’e estragus hotu mákina bomba bee moos 26 mak aat no ninia sistema 6 mós aat hotu, maibé iha semana rua nia laran ita konsegue rekupera 25 mákina bomba bee moos, sei hela ida iha Kamea mak sei iha hela prosesu rekonstrusaun,” esplika Prezidente Bee Timor Leste (BTL), Carlos dos Reis, ba jornalista sira iha Novo-Turizmu, Segunda (10/05/2021)

Carlos esplika, sistema akaptasaun bee moos  iha 4 failla maibé konsege  renormaliza ona, 2 iha Tohu-Meta ne’ebé mak fornese bee ba area Manleuana Surikmas, Bairru-Pité, Kakaulidu too iha Palapasu seidauk hetan bee moos.

“Ami nia ekipa da-daun ne’e servisu hela iha ne’eba, espera iha semana ne’e ita bele normaliza ona bee iha Tohu- Meta ne’e, signifika bee bele tama ona iha ita nua rezervatoriu iha Manleuana para ita bele halo tratamentu ba ita nia ema sira,” dehan nia

Nia afirma, sistema kiik sira ne’ebé mak rekupera ona, ema ne’ebé uza ne’e uituan deit, nune’e mak iha fatin barak ema sei hakilar ba bee moos, tanba sistema akaptasaun bee moos boot iha Tohu-Meta ne’e sei iha prosesu rekonstrusaun, maibé normalizasaun ba bee moos atinje  30, no porsentu 30 asesu ona, ema barak liu mak seidauk asesu.

“Ema besik 60% mak asesu ba bee moos husi Tohu-Meta, no sistema akaptasaun bee moos boot ne’e mak iha Tohu-Meta ne’e,” tenik nia

Tuir Nia, semana ida ou rua tan bele normaliza ona, maibé atu halo metin ba oin ne’e presiza too fulan 6, tanba kanu ne’ebé iha mota laran presiza buka dalan seluk atu mota tun karik la bele kona tan, solusaun temporaria ne’e semana 1 too 2 tan, maibé solusaun permanente ne’e presiza tempu.

Jornalista  : Sandi Belo

Editór         : Agapito de Deus